Ka seiñ Jaiñtia Women Council (JWC) da ujor ko cha u Chairman ka Meghalaya Human Rights Commission pyrchah ya i rukom pynman ya ka Public Hearing ka Meghatop Cement Pvt Ltd ha ka 18 tarik uni u bnai ha Wahiajer, East Jaiñtia Hills District.
Ha ka ujor da ong wa kam ka seiñ dadep ko leh wow lai pyntip cha u DC wow pyntikna wym dooh ki yei hok wow klam ha kani ka Public Hearing tangwa manda poi ha ka thaw pynman Public Hearing ym yoh tang u psiah leh cha kani ka thaw deiwa em ki paidbah wa da khang luti wei da em leh ki pulit kiwa rah lathi.
Najrong ini da em leh i joor bha i sahkut kari ha laad Umtyra neidaw wa booh Check Gate ki bor District iwa da leh du wow pynslem u poi cha ka thaw pynman Public Hearing yow lait u poi heipor wa biang yow pyndooh laad u klam.
Chooh chooh da ong wa ini i leh ki bor District man ko yow khanglaad ya ki wow klam wow pynsñiaw ha kani ka Public Hearing wa katwon u chah ktah deiwa em kani ka karkhana wa thymme wei i myntoi toh du ya ki kattu katni ngut donhi.
Kamtæ da ong wa ini i chah pyndooh yei hok yong ki wow klam da ki bor District man ko pyrchah ya ka aiñ katkam ka riti synchaar ka ri wei pynyoo leh yei leh thombor ka sorkar wow pyndooh yei hok kiwa chong chnong khamtam ha East Jaiñtia Hills lakam wym toh de ka synchaar paidbah tangwa deiwa synchaar leh embor.
Hajrong ini da dawa na ka MHRC wow tuklar yow yoh yei hok.
Discussion about this post