Ka STIEH kawa man kawi na ki seiñ ki manbei wa ki kynthai, ha kani ka 30 Naiynru da ujor ko ha u Director ka Impact Assessment Division ka Ministry of Environment, Forest & Climate Change, New Delhi wow pyrchah ya ka Environmental Clearance (EC) wa da yoh ka M/s Star Cement Ltd. Wei wow kyntu wow pyndam noh ya ka.
Ka seiñ da ong ko wa ka EC wa da yoh ka Star Cement wow tih moochuni toh iwa da leh khlem i pynsñiaw paidbah namo ka Public Hearing.
Da ong ko leh wa man i kaam wa sñiawkhia neibhah wa hajrong i pyrchah wa joor na ki paidbah ka Elaka Narpuh wa ka thaaiñ tangwa neiliang ka Ministry da e bait ko ya ka Environmental Clearance wow tih kani ka karkhana ya ki mar poh-khyndaw na Brishyrnot, Elaka Narpuh, East Jaiñtia Hills.
Chooh chooh da ong ko wa hapoh ka Narpuh Wildlife Sanctuary kawa yajan wa kani ka thaw wa thmu wow tih moochuni da em boonjait ki mrad kiwa em hei maa, wei ye leh u chah ktah ki le tylli ki wah wa kynthup ya ka Wah Lukha, Wah Lunar wa Umso Nalla kiwa pyndap ya ki paidbah ka thaaiñ.
Da kdaw ko leh wa lada yohbor wow tih ya kini ki mar, daw chah ktah leh ki thaw uiñke suwari kiwa ye u yoh khih yoh kreh ki bru wa em ha ka thaaiñ.
Hajrong kini kiyi kiyi waroh neiliang ka STIEH da kyrpaad ko ya ka Ministry wow pyndam noh ya ka Environmental Clearance wa da e cha ka M/s Star Cement Meghalaya Ltd. neibynta i bha i miat ki paidbah wei wow yada ya ka rymaw.
