Ka seiñ Hynniewtrep Achik National Movement (HANM) da beiñ joor ko ya ka sorkar jylla hapoh i yahkhmat u Conrad Sangma wa ym ap ko ya i sur ki paidbah wa boon wa lang wow pyrchah ya i thmu wow tih moochuni ka Star Cement na Brichyrnot, East Jaiñtia Hills District heiwa kani ka karkhana da pynbna ko wa da yoh ko ya ka Environmental Clearance na ka Ministry of Environment and Climate Change ka sokar pyrdi.
Ka seiñ da ong ko wa poi hadooh uni u pood toh neidaw wa da pynbiang chwa næ soi ka sorkar jylla ya ki kot ki sla wa emkaam neibynta katai ka Company neibhah lym kamtæ ka sorkar India ym e bor ko ya kiwon kiwon ki kaam lada ym biang ki kot ki sla na ka sorkar jylla.
Neiliang ka seiñ da ong ko wa ka HANM ym pdiang ko yeini la man katwa man leh neibhah ini i leh toh iwa ym mano u montri rangbah ya i sur ki paidbah wei i leh embor pyrchah ya i sñiaw ki paidbah ka thaaiñ Ri-loom Jaiñtia waroh kawi.
Chooh chooh da ong ko wa u Conrad Sangma ymtoh de wow pynbiej u ya ki paidbah deiwa kdaw-kti cha ka sorkar pyrdi wow ebor ya kani ka karkhana wow tih moochuni ko.
Ka seiñ da kdaw ko leh wa i jngai i thaw wa thmu wow tih moochuni na ka Wah Lukha man i du 1.38 km wei wa em sa ka Eco Sensitive Zone kawa jngai du kamwa 0.25 km na ka Narpuh Wildlife Sanctuary wei lada yohbor ki wow tih moochuni, daw chah ktah lut ki khloo wa ki mrad wa im ha ki.
Ka seiñ daw ujor noh cha ka NGT pyrchah ya ini i thmu wow tih moochuni kani ka karkhana na Brichyrnot, da ong u Shaniahlang Suchen uwa man u President ka HANM Jaiñtia Zone.
