Ka National Milk Day da lehwarom ya ka ynne ha Jowai Dairy Plant wa em ha Mooralong, Jowai heiwa ka D.V. Lyngdoh, Additional Deputy Commissioner, West Jaiñtia Hills da man ko kam ka kongsan.
Ha kani ka sngi da pynkupburom leh ya ar ngut kiwa kynthup ya u Robinus Saioo na ka Manroilang Milk Producers Cooperative Society Ltd na chnong Mulieh kiwa khlan wow wan e dud, wa cha u Banteishaphrang Maskut na ka Banteilang Dairy Farming Cooperative Society Ltd na chnong Mukroh kiwa wan e da i dud wa miat bhah cha kani ka kani ka Dairy Plant.
Ka kongsan da ong ko wa i dud man i iwa emkaam bha ha man-ka-sngi neibhah yarap i hei wow pynheh pynsan kamjooh hei chait i khiah. Da kdaw ko wa kiwa boon ki thaw sñiawthooh bha ki yei myntoi i dud katwa cheini cha ka thaaiñ yong i ym sñiawthooh ware ki yeni.
Da pynchlur ko ya waroh wow pynsñiawthooh ya kiwi wow kynthup lang ya i dud ha i baam yong ki deiwa sñiawkmen wa da ye wow pynman ya ki yakob ha ki skur wa ki College wow pynchlur wow dih dud khamtam ki khynnah.
U Dr. N. Marbaniang, District AH & Veterinary Officer, Jowai da khana u wa da lehwarom ya kani ka sngi toh wow pynsñiawthooh yei myntoi i dud wa ki mar baam wa mih neini.
Hawa e ya ki kyntien pdiang burom, ka M. Shylla, Senior Dairy Officer, Jowai da khana ko wa da pynman ya ki yakob kamjooh i pynsñiawthooh chwa kani ka sngi wow tip yei myntoi wa yoh na i dud.
Ha kani ka sngi da saam leh ya ki khusnaam cha kiwa jop ha ki yakob.
Discussion about this post