Kam chibynta wow pynman ya ka chnong kawa lait na ka kjut TB, neiliang u District Tuberculosis Office, East Khasi Hills District da pynman ko ya ka pynsñiawthooh paidbah hajrong i kjut Tuberculosis deiwa ya krehlang waka St. Edmund’s College, Department of Social Work (UG) ha ka 12 tarik uni u bnai ha chnong Mawthawtieng wa em ha ka thaaiñ Khatarshnong deiwa chimbynta ki khynnah skur, kiwa sikai skur wa kiwa chong chnong.
Hawa e yei klam, neiliang u Dajied S. Dkhar, Senior Tuberculosis Laboratory Supervisor da khana u chaphang ka kjut Tuberculosis wei kammon poor ko kamjooh ki dak ki chin wa mih manda yoh ya kani ka kjut wei kammon wa ye u sumaar. Da e nongmuna u ya kawi ka chnong kawa tip kam ka Mawthangtieng kawa em hi hapoh ka thaaiñ Khatarshong ka wym em wa yoh Tuberculosis hadooh katni.
Neiliang won u Fillan Khongsit, Senior Treatment Supervisor da khana u wa kammon wow yada ya idæ nei kjut Tuberculosis wei yow neh ka chnong kawa lait nei kjut Tuberculosis.
Hadien wa kut i pynsñiawthooh, kiwa kreh ka District TB Office waka Unnat Bharat Abhiyan da e ki yei rwai Phawar hajrong i kjut Tuberculosis deiwa pyn ka-it kasar ya ki bru yow e wyrta chaphang kani ka kjut wei kammon wow pyndooh ka.
Ha kani ka sngi da saam leh ya ki khusnaam cha kiwa jop ya ka yakob dro. Chooh chooh ha kani ka chnong wa em cha kdong cha chmiang da pynsñiawthooh deiwa saam ya ki kot lakdop deiwa pynemkaam ya ki Poster, ki Banner wa kiwi de ha ki ktien wa ye kiwa chong chnong u sñiawthooh.
Kiwa da chimbynta ha kani ka sngi kynthup ki ya u waheh chnong, u Lamphrang Nongrum, ki Executive Member ka chnong, ki khynnah skur ka Mawthawtieng UP School, ka Mawthawtieng LP School deilang wa kiwa sikai skur.
