Ynne ka sngi ka seiñ ki manbei na Ri-loom Jaiñtia kawa tip kam ka Hynniewtrep Women Welfare & Development Organization (HWWDO) da yohlaad biang ko u pteiñ yei e yarap daki marbaam mardih sa cha ki 26 tylli ki manyung wa sah wai ha ki bynta waphær waphær ka chnong Jowai wei yei saam marbaam da pynman ki ha madan Daimasi ha pchem ka Indoor Stadium yong ka Ladthadlaboh, Jowai.
Chwa u saam ya ki marbaam da yoh yei klam pdiang na ka O. Suchiang, President yong ka seiñ kawa da pynsñiaw yei sñiawngooh yow Blai wa da pynyoh u ha ki kam kani ka laad u yarap yaki para bru wa emkaam yarap ha kam kini ki por.
Da kyntu haroh ko ya kiwa wan chim yeini i maarbam wa da e sñiawbha wow pdiang ki dei mynsien wa khooid, hanla man i e wa khian leh, wei da kyntu haroh ko wow duwai ki neibynta ka seiñ yow nangku ko chaphrang wei yow ye chooh chooh ko u chakri neibynta ka ri wa ka jaitbru.
U C. Sungoh uwa e ktien yong kani ka seiñ won pynsñiaw u yei sñiawngooh ya kani ka seiñ wada leh ko yeini i kaam wa bha tam neibynta ka ri wa ka jaitbru, najrong wa da lut ki leh deiwa kynchew naka muna yong ki yow yoh ya kini ki marbaam wa kynthup ya u khoo, ki jhoor, i phñiang wa i blooh.
Kamwa jooh ong wa i chakri yaki pra bru man ko i chakri yow Blai, kamtæ kyntu wei e bor e mynsien haroh u ya ki yow nang ye chooh chooh ki u chakri yei kaam.
