Ynne ka sngi ka Co-ordination Committee on International Border (CCIB) da khut pynman ko ya ka yalang wa jhan heiyatoh wa i kær naar-chieh ya u pood ka ri wa ka Bangladesh.
Ya kani ka yalang da pynman ha Enowell Hall, Amlarem heiwa u Chairman ka CCIB u Sukkynjai Myrchiang da pynlai u ya ka yalang hei emlang uwi na ki bru chemphang ka Ri-loom Khasi Jaiñtia u Morningstar Sumer, ki seiñbhalang kam ka JSU, KSU wa kiwi kiwi.
Ha kani ka yalang da klam hajrong kammon wa i kær naar-chieh daw ktah i ya ki bru kiwa em thaw ha khappood heiwa daw dooh ki chiboon ki thaw yong ki khamtam ki thaw rep.
Uwi na ki dkhot ka Dawki Tourism Development Society (DTDS) da ong u wa manda kær naar-chieh katkam wa da thmu ka sorkar daw haap kær napoh ka thaw wa khih ki dkhot ka seiñ wei ini daw ktah bha i yei kamai yong ki neibhah wa boon na ki da imja ki na ka wah Mynngot.
Hadien ka yalang hawa yaklam wa u Secretary ka CCIB, u Kmen Myrchiang da ong u wa ynne ka sngi da chim ya ka rai wow beiñ ya i e NOC wa sop-sop ka JHADC cha ka sorkar hajrong i kær naar-chieh ha khappood. Chooh chooh da khana u wa katkam ka RTI wa da yoh na ka Council ha ka 13 Naikhynde 2021, da chem wa ka Council da pynim ko ya ka NOC wa da e ha u 2015 ya kawa da pyndam ha u 2017 wei ha uni u snem (2021) da pynim biang ya kani ka NOC khlem i pynsñiaw paidbah wei ha kani ka RTI da chem wa ki MDC ka thaaiñ War Jaiñtia ymtip ki iwon iwon chaphrang ka NOC wei da e ya ka NOC du da ka Executive Committee ka JHADC.
Da ong u wa hawa ka JHADC kawa man ka wow yada ya i thaw i bhaw wa i hok ki tre jylla, ka Council ha kani ka kynti ym em u pyntip ko wot cha ki tre thaw, ki Waheh Chnong wa wot cha u Dolloi chwa wow leh ya ini i kaam kamtæ ka CCIB daw lai ujor ko ha ka Meghalaya High Court wow pynsangeh ya kani ka NOC neibhah wa ya ini da leh khlem tip ki tre thaw, kamjooh leh khlem tip ka CCIB wa ki MDC ka thaaiñ War Jaiñtia.
Chooh chooh da ong u wa ka JHADC da e daw ko wa ya ini da leh katkam ka kyndon Section 41 Clause (iii) yong ka Land Acquisition Act tangwa kani ka aiñ u krehkaam ko du ha ki thaw wa haap hapoh ka Fifth Schedule ymtoh ha ki Sixth Schedule wei yeini daw yaklam yillu wa ki muktiar yow yoh yeiwa che.
Hajrong i kam ka sorkar wa ym tipmit ko ya ka CCIB, da ong u wa ya kani ka seiñ da seiñ nadooh nachwa ka wow yada ya i hok ki tre thaw wa em ha khappood wei ka CCIB toh ka seiñ kawa katkam ki kyndon ka riti synchaar ka ri India namo ka Constitutional Right.
