Jowai: Ka seiñ All Hynñiewtrep People United Front (AHPUF) ynne ka sngi da lai ujor ko cha u CEM ka JHADC u Thombor Shiwat pyrchah ya ki Agency ki baar jylla kiwa booh wakreh Security Guard ha ki karkhana pynmih khyndaw bilat wa em ha East Jaiñtia Hills District.
Katkam ka ujor da ong wa kini ki Agency wym em ki wot ya ki Trading License leh kawa man emkaam bha ya ki u yoh katkam ka aiñ “Trading by Non Tribal Regulation Act 1954”.
Neitæ da chem ki wa em haroh ki Agency wa man tre hei pyrtuid ki tre jylla, tangwa da pynlai won da kiwa na baar nalor wym em ki leh ya ki Trading License.
Heijooh i por da pyrchah haroh ki ya uwi u bru wa pyrtuid u Vinu Shishupal uwa mantre ya ka CSSC Security Agency wei booh wakreh u cha ki karkhana pynmih khyndaw bilat, neidaw wa toh u bru wa da dep chah ujor hakhmat ka aiñ hajrong i pynemkaam bakla yong oo yei mantre ri næ Scheduled Tribe wei da chah pynngat haroh u hapoh ka kyndon “Linage Act 1979” nalor kiwi won ki kyndon aiñ, wei kani ka mukotduma yong oo dang sahteiñ ko hadooh katni ha KHADC.
Kamtæ da dawa ki wa uni u bru wym toh u yoh u wow pynlai ya katai ka kaam ha ki karkhana pynmih khyndaw bilat wa dang haap hapoh u pood yong ka JHADC.
“Hawa booh ya ini i dawa wym mut wow pynthut yei kaam yong ki, tangwa neidaw wym ye u pdiang yei leh embor ne i pynkheiñ aiñ yong ki pyrchah ya ka ri wa ka jaitbru,” ong u General Secretary ka AHPUF u Chandame Sungoh hawa klam cha kiwa thoh khubor hei emlang u President u J. Phawa wa ki dkhot.
Heijooh i por booh ki yei dawa wa toh u elaad da ki Agency tre ri, neibhah da em ki Agency kiwa mantre wei pynlai da ki bru Khasi Pnar kiwa da dep Register wa ka sorkar Meghalaya.
Da pynbaad haroh ki wa i elaad ya ki Agency wa na baar ktah ko ya ki bru tre ri neibhah wa ki wanrah ki leh da ki bru wa na baar wow kreh kam ki Security Guard ha kitai ki karkhana.
Heiyatoh wa ini da kyrpaad joor wei dawa ki yaka JHADC kawa toh u pait ya kani ka kaam wow pynsangeh noh ko chi syndon yaki Agency wa na baar jylla wei elaad noh daki Agency wa mantre da ki bru yong ka jylla Meghalaya.
Neiliang ka seiñ AHPUF da phah ki dei thoh haroh cha ki karkhana pynmih khyndaw bilat waphær waphær wa em ha East Jaiñtia Hills wa toh u pynsangeh noh ki chi syndon ya ki Agency baar jylla.
Hajrong ini i dawa, neiliang u Bormi Phawa, President ka All Meghlaya People Organisation leh e u yei kyrchaan wa pura ya ka AHPUF.
