Ka KSU Eastern Border Area waka KSU Shillong Mihngi Circle ha ka 13 tarik uni u bnai da ujor ki ha u CEM ka Khasi Hill Autonomous District Council (KHADC) hawa da yoh yutip ki wa da em ki kattu katni ngut ki dalal (Agent) kiwa da thmu wow dai lilam ya i thaw wa tip pyrtuid kam ka Wah Swad Umsohlang kawa haap hapoh i pait yong ka Council, kiwa kynthup leh ya ki chnong Lumkseh, Wahmyntait, Mawkduk, Kyrdeng, Lum Diengngan, Lumrit wa ka chnong Mowkynring wa kiwi leh ki chnong kiwa markhap.
Ha ka chithi ujor, neiliang yong ka seiñ da ong ko wa da pyrchah joor lang wa ki paidbah yei thmu thied thaw ki chipai BSF hajrong ki daw wa kiwa boon ki paidbah ka bri u Ynñiawtrep da jooh yachem ki wei sakhi ki na i por cha i por yei chah thombor yong ki bru kiwa lui-lui.
Khaddooh da ong wa ym kwah de wow jynjar wei chah ktah ki paradoh para snam ha ki thaw wa em ki chnat chipai.
Ya kani ka chithi da phah leh cha u MDC ka Umroi wa Mawryngkneng Constituency.
