Ynne ka sngi ka seiñ Saiñdur Tipkur-tipkha Ieng Ehrngiew Hynñiewtrep (STIEH) kawa man ka seiñ ki manbei da thoh ko ya ka chithi cha u Chief Justice ka Meghalaya High Court wow pyrchah yei thmu wow pynman ya ka Public Hearing yong ka M/S Star Cement wow tih moochuni na Brichyrnot, East Jiañtia Hills District, Meghalaya wei ya kani ka Public Hearing da thmu wow pynman ha ka 21 tarik uni u bnai ha pchem ka yung krehkaam u Deputy Commissioner ka East Jaiñtia Hills.
Ka seiñ da ong ko wa kani ka karkhana thmu ko wow tih moochuni na i thaw iwa heh hadooh kamwa 42.015 Hectare ha Brichyrnot wei i daw wa pyrchah ya ini i thmu toh wa daw ktah i ya ka rymaw wa ki mrad.
Da kdaw ko leh wa ya kani ka Public Hearing da haap pyndam la ar sien, itæ ha ka 19 Naichiphaw 2019 wa 30 Duyatra 2020 hadien wa pyrchah ki paidbah na ki chnong ya ini i thmu wow tih moochuni wei hajrong ini da e dorkhat leh wow pyrchah ya ka cha ka Meghalaya State Pollution Control Board.
Da ong leh wa ini i tih moochuni daw ktah i ym du ya ka rymaw tangwa wot ya ka Narpuh Wildlife Sanctuary kawa jngai du kamwa 1.46 km, 0.25 Km na ka Eco Sensitive Zone wa 1.38 Km na ka Wah Lukha.
Da ong ko leh wa katkam ka Environment Impact Assessment Notification, 2006 Under Stage III, i thmu wow pynman ya ka Public Hearing ha pchem ka yung krehkaam u DC ka District iwa man cha baar na i thaw wa thmu wow kreh namo wow tih ya uni u mar poh-khyndaw da tyngkheiñ i ya kani ka kyndon (Notification).
Chooh chooh ka STIEH da kdaw ko leh wa i chah wow chimbynta du kamwa 100 ngut ki bru ha kani ka Public Hearing man i iwa ymye u pdiang neibhah wym man salonsar de itæ i pynsñiaw paidbah neibhah da pyndooh ko yei hok yong ki spah ngut kiwa chong chnong, ki chnong wa marjan wow pynsñiaw yei mon yong ki weiwa boon na ki paidbah pyrchah ki yeini i thmu kani ka karkhana.
Deiwa kdaw ya ki kyndon wa da em ha ka riti synchaar ka ri, neiliang ka STIEH da ong ko wa deiwa ym yohsa da thooh ya ki laad ki luti wow yada ya i hok ki paidbah neibhah wa ki bor sorkar ym mano ko wow ap yei kwah yong ki.
