Khliehriat: Ka AJYWO Central Body ynne ka sngi hapoh i yahkhmat u M.H. Dkhar, President yong ka, wa u Heatermoon Ryngkhlem President, ka AJYWO-EJZ, da lai booh ki da ka ujor ha u DC ka East Jaiñtia Hills District, u M.S. Lhuid, IAS, pyrchah ya kawi ka karkhana wa em ha Lad-Jalyiah, ha ki thaiñ Lad-Rymbai hajrong i pynmih tdem rong yong kawa man ka sngi.
“Chwa wow khang ka NGT wow tih mooyong hapoh ka jylla ya kani ka karkhana da tip kam ka M/s Abhi Coke Factory kawa thang mooyong tangwa hadien wa khang ka NGT, kani ka karkhana leh da khang noh, tangwa ha kini ki tayaw wa da dep da yoo biang yei tdem na u toskhana yong kani ka karkhana wei da ye ko u ktah ya ka rymaw wa i chait i khiah yong ki bru,” da ong u H. Deolangki Dkhar, Secretary General, ka AJYWO Central Body.
“I da suba joor i wa katai ka tdem wa rben wa yong kawa pynmih na katai ka karkhana daw ktah joor ko ya ka chait ka khiah yong ki paidbah wa chong wa sah soodong yong kani ka karkhana kamjooh leh ya kiwa lai wa wan lyngba yong ka NH-44 khamtam ya ki khynnah skur yong ka Good Shepherd Secondary School kawa em mar chilliang sarok kani ka karkhana,” ong sa u J. Reachingson Siangshai, Vice President, ka AJYWO Central Body.
“Ka AJYWO ym e laad ya kini kiwa kamai spah wow booh ya i chait i khiah yong ki paidbah hei ma. Kamtæ ha i yachem wa u DC ynne ka sngi, i da dawa na oo wow sñiawbha u wow lai li pait smat noh ya katai ka karkhana yeiwa ktah ko ya ki paidbah,” ong biang u H. Deolangki Dkhar.
Ha kani ka jooh ka sngi ka AJYWO leh da dawa ko na u DC wow phah pynbait u yeiwa thoh bakla ka Company GR Infra Ltd. kawa pynkreh ya u sarok NH-44 heiwa kani ka Company da thoh bakla ko ya ki pyrtuid ki chnong ki dong wa boon wa em ha West wa ha East Jaiñtia Hills.
Discussion about this post