Jowai: Hadien wa yoh ujor na ki manyung kiwa chah ktah na i ku dor palat i bai bordiñ ha ka thaaiñ Mynsngat, neiliang ka Jaiñtia Student Movement (JSM) Mynsngat Unit wa Nartiang Circle da lai ki wow ujor noh ya ini cha u Deputy Commissioner ka West Jaiñtia Hills District u Garod L.S.N. Dykes, IAS ynne ka sngi deiwa pynsñiaw ha oo wa ka seiñ da dep ko wow phah dei thoh ha kini ki bnai wa da dep cha ka yung krehkaam ka MePDCL Khliehtyrshi.
Tangwa hadooh kattæ, neiliang u Assistant Executive Engineer, ka Khliehtyrshi Distribution Sub-Division (MePDCL) ym em leh u iyi iyi hajrong ini, kamtæ ka seiñ da kyrpaad ko na u DC wow tuklar lang ya ini i eh yong ki paidbah khamtam cha ki thaaiñ nongkyndong neibhah boon na ki bru man ki kiwa dooh wa duk wei kiwa im da i rep i riang.
Da pyntip leh wa ini i ku i bai bordiñ da booh ko hei eh ya ki paidbah wow su ya ka bai bordiñ kawa da ku cha palat pood, chooh chooh ka seiñ ka kwah ko wow booh kylli ya ka yungkrehkaam u Assistant Executive Engineer, Khliehtyrshi Sub-Division wa ileh wa uwa saam bai bordiñ ym jooh pait u ya u Meter hawa e bai bordiñ cha kiwa chong chnong ka thaaiñ.
Hawa thooh yei daw i ku dor i bai bordiñ na u Assistant Executive Engineer, neiliang yong oo da pyntip u ha kiwa yahkhmat ka seiñ wa ye u man na ka ram wei ini da pynlyngngoh ya kiwa chong chnong neibhah wym em kawon kawon ka ram hawa yatoh wa ka bai bordiñ, da pynkut ka kywoh na u Phresmi Suting, President ka Mynsngat Unit wa u Head Phalangki, President Nartiang Circle.
