Ka seiñ Khooid Yaka Wah Myntdu ynne ka sngi da lai ujor ko cha u Deputy Commissioner ka West Jaiñtia Hills hajrong i pteiñ ka M/s Dhar Construction Company u noh khyndaw cha chariñ loom wa em harood ka wah Myntdu, deiwa kyntu ya u DC wow pynman i hiar lai pait lai sylli yong lang namo (Joint Inspection) kat wym pu rah u slap yaki khyndaw chaka wah Myntdu, neibhah wa ha kini ki sngi wa dep neidaw wa joor u slap da em i oor khyndaw hajan yiñgkieñ Treyongriang wa kiwi ki bynta u sarok NH-40 (E) wa dang pynchna sarok da ka Dhar Construction hi.
Ka seiñ pynsñiaw ko i pyrchah joor hajrong i noh khyndaw kani ka Company iwa yoo ko haka 15 waka 17 tarik uni u bnai.
Da ong wa ini i rukom leh yong ki najrong wa pynsih yaki hali pynthor, ktah ko leh yaka wah Myntdu kawa pyndap umbaam umdih yaka chnong Jowai.
U K.L. Pariat, President ka KYWM ong u wa da ban joor ki ya u DC wow pynchitom katkam ki kyndon yaka chnat wa toh u pait kamjooh yaka M/s Dhar Construction Company lane u Contractor lada tyngkheiñ ki ya ki hukum NGT.
Wei hajrong kani ka ujor neiliang u DC da pyntip u cha ki wa daw phah u ya ka ujor yong ki cha u EE PWD Roads Jowai Central Division yow leh u yeiwa emkaam.
