Hajrong i pynkhreh ka chnong Panaliar, Jowai wow pynman yaka “Syntu Ksiar Musical Concert” haka 03-04-2021 ha i thaw wa tip kam ka Iong Ka Skot, ynne ka sngi neiliang ka Dorbar Chnong Chyrmang Neiñ da lai ujor ko cha u Deputy Commissioner ka West Jaiñtia Hills District, deiwa ong wa ya kani ka Concert da thmu pynman khlem i yoh bor næ NOC naka dorbar chnong wot hawa i thaw toh iwa dang haap hapoh u pood u ang yong ka chnong Chyrmang Neiñ.
Heini i lai yachem da emlang nadooh u waheh chnong u Skhemki Dhar, u Asst. Waheh Chnong u Ker Lakiang, u Secretary Chnong, Phimos Talang, u Sto Shylla, u Rol Lakiang, u Sngawhi Lakiang kiwa man ki dkhot chnong, wei neidaw wym em u DC ha kani ka sngi, ya ka chithi ujor da ekti noh ha u P.K. Boro, Additional Deputy Commissioner West Jaiñtia Hills District.
Neiliang kiwa yahkhmat ka chnong Chyrmang Neiñ dap ki dei sñiaw phylla hadien wa da tip ki waka Dorbar Chnong Panaliar da pynkhreh ko chait chait yaka Musical Concert ha katai ka thaw, neibhah kam ka dorbar chnong wym em yoh ko iwon iwon i pyntip næ i paan bor, wei seiwi leh kani da man ko chibynta i yuhroit yei hok i bynta yong ki.
“Hei sakhiat i ym em i iwon iwon i thmu wow khang næ pyrchah ya katæ ka Musical Concert wada pynkhreh ka chnong Panaliar neibhah sñiawthooh i wa kani leh toh chibynta i bha wa i myntoi, tangwa iwa sñiawphyllla wei diaw won toh wa ki ym em paan bor ki naka chnong,” ong u Skhemki Dhar, Waheh Chnong Chyrmang Neiñ.
Hajrong ini i lai yachem yong ki wa u P.K. Boro Additional Deputy Commissioner, neiliang yong oo da kular u wow chimkhia ya kani ka kaam khnang yow lait u mih iwon iwon i kulmar.
