Cha u Modi u thoh ka AJYWO wow pyrchah ya ka CAB-2016

Jowai: Ka All Jaiñtia Youth Welfare Organisation Central Body, kawi na ki seiñbhalang ki khynroo na Ri Jaiñtia, ryngkhat wa ka NESO, da pyrchah joor ki ya ka Citizenship Amendment Bill 2016 ka sorkar pyrdi kawa kwah wow kdup u kdung kam ki tre ri ya ki khian paaid kam ki Hindu, Sikh, Buddhist, Jain, Parsi wa Christians kiwa na Afghanistan, Bangladesh wa Pakistan.

“Ka AJYWO, pyrchah ko yeini i thmu toh neidaw wa daw booh ko ya ki jaitbru khian paaid yong ka jylla Meghalaya wa ka thaaiñ mihsngi ka India hei maa wei ye ki wot wow doohjait noh nei chah tlep ha kiwi ki heh paaid,” da ong u MH Dkhar President, ka AJYWO Central Body.

Ka seiñ da ong ko wa ym kwah ko wa ki khian paaid ka thaaiñ u chah tlep chah tymmoh ki deiwa e nongmuna ya ka jylla Tripura heiwa ki tre jylla da man pathan ki kam ki khian paaid.

“Kammon ka sorkar India, wot ya ki khon ki kti ymye ko wow pyndap pynbiang ya iwa emkaam ha waroh ki liang, kattæ dang kwah pathan ko wow kdung ya kiwi tawon ki jaitbru na kiwi tawon ka ri,” da ong ka AJYWO.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

“Lada ka sorkar India, pynman aiñ ko ya kani ka Bill, i kam ki tre ri khian paaid yong ka thaaiñ mihsngi, daw em i ha i maa wa khroo, katwa kamtæ emkaam wow yieñ tylli wow pyrchah joor ya kani ka Bill yong ka sorkar India,” da pynrap ka seiñ.

Da ong ko leh wa katni ymtip de ya ki jaitbru wa em ha ki bynta ka thaaiñ mihsngi lada toh kiwa na Bangladesh, næ Pakistan, næ Afghanistan wei i kaamram ka sorkar toh wow kynreh ya ki baar ri wei boh beh noh ya ki ymtoh wow phon wow pah ya ki wei wow pynman ya ki kam ki tre ri India.

Hajrong ini waroh ka seiñ da ong ko wa daw phah dorkhat ko cha u montri rangbah dooh ka ri u Narendra Modi, wa u montri ka MHA u Rajnath Singh wow pynsñiaw yei pyrchah ya ka Citizenship Amendment Bill yong ka ri India wow pyndam noh ya ka.