Uwa chong chnong ka Jowai, u O.R. Shallam da thoh u cha u Montri ka sorkar pyrdi, u Nitin Gadkari uwa pait ya ka Ministry of Road Transport & Highway yow ujor pyrchah ya ka sorkar ka jylla Meghalaya yei wym ye ki u pynchna ya u sarokbah NH-6.
Ha ka ujor da ong wa ki bru ka Ri-loom Jaiñtia, ya u sarok NH-6 uwa chibynta u sarok wow lai cha Shillong wei da pynyabi u leh ya ka Silchar, Assam da man u kam u thied snam ka Ri-loom Jaiñtia uwa pynyabi leh ya ka thaaiñ wa waroh kawi ka jylla tangwa da man u uwa sih hadooh kattæ kattæ heiwa 80% u sarok toh uwa sa du i thlu donhi.
Da ong leh wa i sih uni sarok katni toh i wym jooh man kamni nachwa iwa da wanrah leh yei ood na ki paidbah wa lai wa wan heiwa da wanrah yei sahkut kari da kiwa boon kynta iwa da ktah kylla ha waroh ki liang.
Da kdaw leh yei boonkaam u Montri Rangbah ka jylla hei wow lai cha ki yalang ka Party cha kiwi ki jylla wei da leh muja u katwa ki bru hapoh ka Ri-loom Jaiñtia da chem chitom ki kiwa da man kam ki khonswet kiwa boon du i eh kat chawa kyruiñ wa leh u sarok NH-6.
Kamtæ da kyrpaad ya u Montri wow leh yeiwa emkaam yow phah pynchna ya uni u sarok lym kamtæ daw chem chitom waroh kawi ka thaaiñ Northeast neidaw wa tlot i krehkaam ka sorkar jylla hapoh i yahkhmat u Conrad Sangma kam u Montri Rangbah.
