Jowai : Ka seiñ Jaiñtia Hills Truck Owners Association (JHTOA) ha kani ka 16 Naiynñiaw da pynman ko ya ka yalang General Meeting ha Ynñiaw Mer wow pyrkhat ya i eh i khoo wa yatyngkhooh ki dkhot yong ka.
U President ka seiñ u ma Nidamon Chulet da pyntip u wa ki Karkhana Khyndawbilat wa em ha East Jaiñtia Hills da yoohbeiñ ware ki ya ki kiwa man ki tre jylla weiwa lada kamani ym em yumut u em ki cha i.
Da ong u wa 95 naka 100 ki tre jylla em ki ya ki truck 6 chaka wei deilang da em ki palat 800 tylli tangwa kini ki karkhana pynemkaam ki du da ki 12 næ 18 chaka yow kit ya i khyndawbilat wa u clinker.
Kiwa chalan khyndawbilat (transporter) ksih dor ware ki ya ka bai kit (bhara) neipor cheipor kam ka nongmuna na ka T. 800 cha ka T. 700 neitæ won cha ka T. 600 chi ton iwa tang kat ka bai phniang, ka bai baam wa ka bai driver leh ym khai de ko. Katwa kamtæ boonsien jooh phah kit ki du da ki truck 18 chaka wa ye u kit chiboon katwa ki tre jylla wa em du da ki 6 chaka da yap yaw chwa ki.
Hei yoh u yaklam wa ki heh kani ka seiñ wa kiwa thoh khubor da ong ki wa neidaw wa chah ksih dor ware ki tre jylla boon ki truck man ki kiwa thied dei chim ram kamtæ neidaw wym ye u su ya ka ram ki Bank da wan taan ki ya kiwa boon tylli ki truck.
“Ini i ksih dor ki karkhana toh i buit yow pynbor ya i wow randien noh i neitæ yow ye ki u pynemkaam da ki yong ki hi ki kari” da ong u ma Chulet.
Ka seiñ da pyrchah joor ko ya ki truck wa 18 chaka hajrong ka nongrim wa ktah ko ya i kamai jakpoh ki tre jylla, dei langer sah block neidaw wa leh ki, i jia yatyngkhooh kari neibhah wa man ki kiwa jrong bha weiwa ym yahap ya ki u lai ki na uni u sarok ha jylla neibhah wa khian, wa riat wei dor ware u.
Kamtæ ka seiñ da rai ko wow yachem wa ki Montri ka tnat Transport, wa kiwi ki heh sorkar heiyatoh weini.
Kini ki truck 18 chaka ym ye u pynsakhiat katwon ton kit ki neibhah ki weighbridge wa em ha Ynñiawmer leh ym ye ko u thaw ya ki neibhah wa da jrong da ka truck ya ka pyrla.
Da rai leh wow lai yachem wa kini ki karkhana hei yatoh weini.
Ka seiñ da kyntu ko leh wow booh noh ya ka Emmission Testing Station neibynta ki Vehicle Pollution Certificate ha Jaiñtia Hills neibhah wa dei langer chah daiñ kuna ki kamwa T. 1000-2000 ha ki pulit Assam neidaw wym em ki ya kani ka Certificate wei kamjooh leh yow booh noh ya ka tnat yong ka State Transport Authority Branch ha Jaiñtia Hills yow smat u pynthymme ya ki kot kari.
Discussion about this post