U Chairman ka Lokayukta ha ka 10 tarik u Naisan da pynmih hukum u wow phah ya ka chnat takit ka Meghalaya Lokayukta wow e ya ka Report hapoh 15 sngi heiwa ya kani ka hukum da pynmih katkam ka ujor u Kingstone Bolwari pyrchah ya u Chief Executive Member ka GHADC u Benedict R. Marak hajrong ka poisa wa T. 100.71 klur wa da e da ka Ministry of Tribal Affairs ka sorkar India yow pynkrehkaam ya ki kaam pynroi hapoh ka Special Assistance Scheme neibynta u snem 2015-2016.
38 tylli ki kaam pynroi da e cha ka Raksamgre Constituency wei da e por wow pyndep ar snem tangwa hadooh katni dang sah ki khlem pyndep wei hajrong ini da ujor hakhmat ka Lokayukta.
Ha ka Complaint Case No.5 ka 2021 da ujor pyrchah ya u Sanjay A. Sangma wa u Dolrich D. Sangma. Heiwa u Sanjay A. Sangma da yoh u yei kaam wow chna ya ka Member Hostel Tura hapoh ka Special Assistance ka sorkar pyrdi neibynta u snem 2015-2016 wei i kreh man i iwa chongdor T. 6,01,31,100 katwa iwa e cha u Dolrich D. Sangma toh T. 3,52,12,280 hapoh ka jooh ka Scheme nibynta i jooh i por wei yeini da chem leh lyngba ka RTI.
Hajrong ini i jooh neiliang ki wareh ka GHADC hapoh ka lama ka NGEA da thoh ki cha u Prime Minister ka ri yow dawa pynman ya ka takit da ka CBI yei wym pynkrehkaam wei pynemkaam bakla ya ka poisa paidbah wa 100.71 klur wa kiwi de yarap poisa ka sorkar pyrdi nadooh u 2016-2016 wa 2017-2020 wa da e cha ka GHADC.
Ha ka chithi wa da thoh cha u Prime Minister da ong wa na ka 100.71 klur da dep wow sai T. 69,44,816 klur tangwa waroh ki kaam pynroi toh kiwa sah khlem pyndep wei katkam wa chem ka RTI dang sah sa T. 31,49,55,184 kawa ym em pynkrehkaam ka GHADC.
Chooh chooh da ong wa da e T. 5,82,51,800 klur cha ka Twinkle Newar Sangma wow chna ya ka Documentary Film chaphang ka dustur riti ki Garo kawa hadooh katni ym pu em dep u chna katwa cha u Sanjay A. Sangma uwa man leh u Kong u Conrad Sangma da e T. 6,01,31,100 klur i kreh yow chan ya ka Member Hostel Tura tangwa hanla da dep wow sai 60% ka posia ym em ye u pyndep ya kini ki kreh katkam i por wa da booh.
