Jowai : Ki paidbah ka ri-loom Jaiñtia ha kini ki ar le sngi da wit da thut i khih i kreh nadooh ki office sorkar, ki dukan dukdoh ki kharkhana hadooh ki paidbah ha liang wanang neidaw wa thut i rukom saam light ka MeECL.
Ynne ka sngi da dooh ka light waroh chi sngi, neiliang u Wyrta da lai yachem u wa kiwa kreh ha MeECL yow yoh yutip wa bniah heiyatoh wa ini i dooh light.
Neiliang kiwa kreh da khana ki wa ha kini ki ar le sngi i thut toh neidaw i rukom man i long ka suiñbneiñ wei katkam wa man hi u transformer ha Loom Pyrdi Iongpiah da iñ u waroh nei daw u pyrthat, da sih leh ki transformer ha Chutwakhu wa ha Salaroh.
Heiyatoh wa ynne ka sngi, ki heh ka MeECL da ong ki wa da yap ka laiñ waroh na ka Northeastern Grid neidaw wa em i thut wa joor bha ha ki kor ki bor (system failure) iwa mut waroh ka thain North East da duh light ko haduh kamwa 3 kynta.
Ka NE Grid da dep chna ko yei wa sih hawa da wan biang ka light hei por 4 waje janmeit tangwa du chibet chipor da duh biang ka light nei wa da tkut ki wire light ha Thlu-muwi nei daw wa dat u pyrthat.
Heijooh i por leh da ong wa slem i kreh watoh neidaw wa joor u lailieh wa ye leh u pyrthat u poi heiwon heiwon i por iwa ye u booh ya kiwa kreh hei ma.
Discussion about this post