Da u Soolangki D. Laloo
I por yong ka da jan kattu
Yei man wei sñiaw wa wan kyrsu
Khynnah, waheh, khynroo khyllood, manbei manpa
Waroh waroh wa ya khih sa’a.
Hei burom u Trekirot
Yei man yongka wa pynsarot.
Kaam niam rukom wa pynthiah pynchong
Sarin pa sarin katkam ki hukum adong.
Nadooh na yung hadooh ha Raij
I khreh tayar walai chait chait
Ka kchu ka siang, u kni u pa
Kam niam u pyndep dei montyrna.
Soo sngi le yaw, ya ka u pyndep i
Chirup wei sur ka bom ka bhuri
Ha biar ha ktieh u ya chaad deilang
Yei man wei sñiaw wa pyntympang.
Ish! Ha uni u snem kammon ma-ai?
Dak kylli wamih kat cha wa wan wa lai.
Daw yoh ma-ai, u ya chaad ya mih kamwa jooh,
Ha khmat ka yaw ka syiem deiwa yoopheiñ yoophooh?
Waroh waroh hei niawliar niawtang
Ya ka jubab wa yooluti wa yang.
Pisa lang-a i man wei sñiaw
Tiap tiap wa da jan poi ki sngi ka tayaw
Kyntien pynkut heini u booh
A! Khon ka Niamtre yieñ hei dem i ngooh.
Kutlaad hei pyrkhat pyrdaiñ to beh cha jngai
Burom ka niam yow bna ka pyrthai.
Yieñ dap chynrang kynthai wow pynkhroo
Yei burom u Trekirot,
Na yung ha raij ha dong deiwa sarot.
