Da U Soolangki D. Laloo
Chaad Niam Behdieñkhlam ka Raij Tuber
Kylleiñ da bna wa heh wei phær
Hadien ka Raij Jwai pali yong ka
Rukom dustur da booh nachwa
Soo Langdoh-Soo Raij nadooh nachwa
Sarin ki kaam niam da booh bynta
Yei mon i khe u Trekirot u pyndep
Yoh ki chnong ki Raij u kyllep u sdep
Da dep na Jwai kattu ha Tuber
Sakhi ya ka Chaad Niam Behdieñkhlam wa yoophær
Ymtoh de kam wajooh hur-hur, hær-hær
Nadong cha dong waroh daphær
Soo sngi u pyndep hei burom u Trekirot
Na yung ha chnong ha Raij deiwa sarot
Deilang wei bood ya ki hukum adong sorkar
Wow man ka laad yada na ka khlam ka kjut wa poor wa paar
Kynaad i sih ha uni u snem
Kylleiñ pyrthai tynjooh u chem
Waroh kat i wamut wamang
Ym yoh de kam wa yooluti wa thrang
Kylleiñ ki chnong ki thaw wym yoh de kam wajooh
U mih yachaad yakmen dei wa yoopheiñ yoophooh
Kut sadu ha dwar ha pchem donhi
Wa chongchit i ood i thai i sur ka bom ka bhuri
Kyntien pynkut heini u thoh
Khon ka Raij Tuber, Chaad Niam Behdieñkhlam
Wasuk Wakmen ya phi waroh
Pynkhroo yei burom u Trekirot
Wei man kyrpang ka jaitbru hakhmat ka pyrthai
Ha ka yurim i sikai niam wa yoh
“Kamai yei Hok Wei im Tipbru–Tipblai”
Maya yei yong i, burom yei yong kiwi
Luti i suk i saiñ u chem ha pyrthai sngi.
