Jowai: I yakhih pyrchah ya ka Citizenship (Amendment) Bill 2016 wa pynman da ka North East Student Organisation (NESO), ynne ka sngi da poi ko cha New Delhi heiwa ki seiñ na thaaiñ mihsngi da pynman ki ya yakhih pyrchah ya kani ka Bill ha Jantar Mantar, New Delhi.
Ha kani ka sngi da em ki 8 tylli ki seiñ wa em hapoh ka North East Students’ Organization (NESO), wa kynthup ya ka Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) waka All Arunachal Pradesh Students’ Union (AAPSU) kiwa mihkhmat ya ki yakhih kiwa dang puræ namo ki Student na ki 7 tylli ki jylla ka thaaiñ mihsngi ka ri, da pynman ki ya kani ka yakhih yow pyndam ya ka Citizen (Amendment) Bill 2016, Foreigner (Amendment) Order 2015, Passport (Entry in to India) Notification 2015 wei wow e Visa wow sah slem chapoh ka thaaiñ mihsngi yow yada leh yei psiah bei-aiñ ki nong Bangla.
Ha kani ka sngi da yoh yei klam na u Samuel Jyrwa (NESO), u Manjeet (AMSU), u Hawa Bagang (AAPSU), Pendra Debarrma (Adviser, TSF), Lurin Jyoti Gogoi (Gen. secy. AASU), Donald V Thabah (GS KSU), u Tengsak Momin (President GSU) wa kiwi kiwi.
Ya ka yalang da pynlai da u Dr. Samujjal Bhattacharya.
Ki dkhot ka KSU CEC kiwa da chimbynta toh u Lambok Marngar, Donald Thabah, Rapborlang Nongrum wa u Raymond Kharjana.
Ka NESO da dawa ko leh wow pynkrehkaam noh ya ka NRC ha waroh ki jylla ka thaaiñ mihsngi wei u booh ki kyndon wow pynkrehkaam ya ka yow lait u jia kamwa da man hapoh ka jylla Tripura heiwa ki tre jylla da man ki kiwa khian paaid wei da jia leh katni ya ini i jooh ha jylla Assam.
Discussion about this post