Ka chnong Nongthymme kawa em kamwa 100 yung kawa haap hapoh East Jaiñtia Hills District da dap ko da i sñiawsih hajrong i chah ah wei poi duna u khoo rachon neibynta kiwa dooh kamwa 400 Kg man-u-bnai.
Hadien wa ka chnong da yoh ko ya i ujor na kiwa chong chnong wa na u Dealer ka chnong hajrong i chah ah wei wa poi duna u khoo rachon man-u-bnai. Neiliang yong ka chnong da lai e ki dei thoh wow ujor ha u Deputy Commissioner (Supply) ha ka 8 tarik uni u bnai tangwa wot hadien ini leh, dang pteiñ i chah ah u khoo rachon kamjooh biang.
Ka chnong da ong ko wa ini i chah ah khoo rachon man-u-bnai da man ko ka baam-tooh wa chyrkhei bha hapoh ka NFSA wei ini ye u man leh iwa ye u jia wot cha kiwi ki chnong hapoh ka District leh.
Da ong leh wa ini i chah ah kilo da ktah ko chiboon bha ya ki manyung mansem wa dooh (BPL) wei man ko leh kamwa knieh ya i pliang-ja yong kiwa dooh kiwa toh hok wow yoh yei myntoi na kani ka yarap wa poi naka sorkar pyrdi.
Hajrong ini waroh, kam ka chnong da dawa ko naka sorkar jylla wa na i yungkrehkaam u Deputy Commissioner wow lai pait bniah ha ki Godown ki PDS chwa wow saam ya u khoo rachon cha ki chnong.
Ya kani ka wryta da pynlait da u Secretary ka chnong Nongthymme, u P. Muksor.
