Chah ah tulop ki wakreh ka EMRI 108 neidaw wa pynman yakhih ki

Shillong: Ki wakreh ka GVK EMRI 108 hapoh ka Meghalaya EMRI Worker’s Union (MEMRIWU) da pynsñiaw ki yei sñiawphylla wa i khyrngiat neidaw wa ki bor pynlai da ah ki sa ya ka tulop yong ki yong u Naiynñiaw.

Katkam ka kyrwoh wa da phah da u Publicity Secretary ka MEMRIWU, u Joseph Pyngrope da ong, “Wot hadien i yachem wa ki heh ka chnat ka chait ka khiah kamjooh wa ki bor pynlai ka 108, i khyrngiat i wow chem wa ki bor pynlai da ah ki sa ka tulop ki wakreh wa toh u yoh ki.”

Da ong u wa hawa kylli ya i daw wa leh ya ini, neiliang ki heh wa pait yaka Human Resource yong katai ka Company, ka Amanda Marbaniang ka da sait kti ko wei da pynbaad ko ya ki ar ngut ki Emergency Management Executive, kiwa kyntup ya u Suggestme Thubru wa u Shanborlang Pyngrope kiwa da pynche wa i ah tulop toh neidaw wa sangeh kreh wa i pynman ya ka yakhih da ka MEMRIWU ha u bnai wa da dep.

“Ini man ko leh ka yooh beiñ ki bor pynlai ka 108 ya ki wakreh, nalor wa ha ka yachem ki sahep ka sorkar da mynjur ki wow burom wei wow sñiawthooh markylliang,” da ong ka kyrwoh na u Publicity Secretary ka MEMRIWU.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Uwa yahkhmat ka MEMRIWU da dawa u leh na ki bor pynlai ka 108 wa toh u pynche paidbah hajrong ini i chah ah tulop ki wakreh. “Lada wow yakhun neibynta ka hok ktah ko yaka jakpoh yong i, ka Union ka dawa ko na ki bor pynlai wa toh u pynche paidbah,” da ong ka kyrwoh.

U Pyngrope da kylli u leh wa lada ki bor pynlai embor ki wow ah tulop næ wa da e bor ya ki da ka sorkar.

“I dawa i ya ka pynche paidbah hajrong ini i leh ki bor pynlai wei toh u su lut ya ka tulop wa chah ah khlem da pynslem,” ong u Pyngrope.