Ka Elaka Nartiang Coordinate Committee (ENCC) ynne ka sngi da pteiñ ko yei pyrchah yei wan noh jhep ki Truck ka Jowai Municipal Board (JMB) ha i thaw wa tip kam ka Mootchutsdai Mookabeng wa em hajan ka chnong Sohphoh, West Jaiñtia Hills deiwa beh biang ya ki kari kit-jhep ka Jowai Municipal Board (JMB).
Kani ka Committee wa kynthup lang ya ki seiñbhalang wa ki chong kam ka Kdohkule, Thadmusem, Nongkhroh wa kiwi kiwi da kah ki da ki moo wa heh wa ki dieñ ha ka luti wow lai ki Truck noh-jhep yow ku cha ka thaw noh-jhep.
Neiliang ki bor District da phah ki chi Bus ki pulit wei da em leh ka Magistrate hadien wa da pynkrehkaam ya ka Section 144 CrPC yow khang ya ki bru wow yalang ki palat 5 ngut hajan ini i thaw noh-jhep kamjooh wow rah ya ki tiar pynmynsoo.
Neiliang ki paidbah da leh pyrchah ki yeini deiwa ya mih yonglang wym e laad ya ki Truck wow lai luti ki hadooh wa hap ki wow liwan biang cha Jowai.
