Ki khynroo khyllood kiwa yaleh ya ka Exam LDA kawa pynman da ka MPSC wa toh u thoh ynne ka sngi ka 13 tarik ha nongbah Shillong, da slem ki kamwa 15 minit na i por wa da booh wow man Exam, itæ 10:00 waje i step.
I daw wa slem ki toh nei joor ware i sahkut kari ha sarok Jowai-Shillong wei manda mut wow psiah chapoh ka Exam Hall da chah beh pathan ki ha kiwa pynlai ka MPSC deiwa e daw wa da slem ware ki wow poi neiwa da booh por.
Uwi na kiwa chah beh da ong u, “Nga wa ki lok yong nga boon toh kiwa na chnong Jowai kiwa wan yaleh ya kani ka Exam tangwa da chah beh noh i neidaw wa slem i”.
Da kylli u leh dei chrai hakhmat ka sorkar wa hakhmat kiwa pynlai ya ka Exam MPSC wa du neidaw wa slem 15 minit ym chah de phi wow psiah, wei ymtoh mo wa kyndehke phi wa ka mynried yong i?
Chooh chooh ki khynroo na Jowai ynne da dawa ki na ka sorkar wow booh noh ya ka Examination Centre ha Jowai.
Da ong ki leh wa ini pynyoo i wa ka sorkar ym chimkhia ko wow pynbiang yeiwa emkaam ki khynroo ha Jowai neibynta kiwa na East wa West Jaiñtia Hills neibhah man-i-por da hap u lai bait ki cha Shillong wow thoh Exam wei da chem da boonsien yei sahkut kari.
Khaddooh da kyntu ki ya ka sorkar khamtam ki 7 MLA na Ri-loom Jaiñtia wow pyrkhat yillu yeini neibhah boonsien kiwa lai thoh Exam toh kiwa wan na ki manyung wa duna hei yoh i laa wei ymye ki wow sahmiet ha Shillong wow lai thoh Exam biangpor kamtæ deiwa em ka Centre ha Jowai daw ye ki wow pynemkaam yei hok manbru yong ki.
Discussion about this post