U CEM ka JHADC, u Thombor Shiwat ynne ka sngi da ong u wa hadien wa yoh ujor ki wa em i tih moo wei pam dieñ ha ki thaw thung dieñ ka Council ha Saitsama wa ha Thadmynri, ynnin ka sngi ka Executive Committee chirup wa ki sahep da lai pait lai sylli ki ha kini ki thaw.
Da khana u wa ha Saitsama da chem wa em sakhiat i tih mooleiñ heiwa da chem leh wa da dai ka chnong Saitsama yei thaw wei hawa kylli na u Secretary ka Saitsama da kam u wa ini i thaw toh i yong ka Saitsama tangwa manda lai katkam ka Map da chem wa haap i thaw hapoh ka Council.
Chooh chooh da khana u wa ya u moo da dai cha kawi ka Contractor na Assam kawa tih mooleiñ, tih chyiap wa ki dieñ deiwa pynemkaam ya ka Mining Lease na Assam ymtoh na Meghalaya heiwa neiliang ka EC da ong ko wa ini jia i dei langær ha ki thaw ka Council wa em ha khappood.
U CEM da kylli u leh na u Secretary Chnong ka Saitsama wa hawa em i thaw hapoh ka Council weileh won da dai khlem yohbor na ka JHADC, yeiwa u Secretary ka Saitsama da jubab u deiwa ong wa da leh chynnam neibhah wa tlot ware ka sorkar Meghalaya.
Hajrong ini da phah hajir ya ka chnong cha ka Council ha ka 10 tarik uni u bnai.
Ha Thadmynri da chem wa em i tih moo wa u mooleiñ uwa da ieh chithaw heiwa da em leh i kyntoor pood nei thung saroo.
Katkam wa man katni ini i thaw da ktah bha i ya ka Council khamtam ha Saitsama heiwa da wanrah ka JHADC ya ki kor wa heh weiwa da kem (Seize) ya u moo wa ki dieñ wa da chah pam.
Discussion about this post