Ka United Hynniewtrep Movement (UHM) hadien wa yoh yutip ki na ki dkhot yong ki kiwa na East wa West Jaiñtia Hills wa ki pulit ka Assam da chna ki ya ka Police Outpost ha i thaw wa kajia pood ka Assam wa Meghalaya, kamtæ ki dkhot ka seiñ deilang wa u Waheh Chnong ka chnong Saba da lai hiar ki cha ka chnong Mukroh kawa em ha khappood ka Assam-Meghalaya hei step ka 23 tarik yow pait ya ini iwa chna ka sorkar Assam.
Neiliang ka seiñ da pyntip chwa ki cha u Officer In-charge ka Nartiang Police Station wa daw lai hiar ki cha ka chnong Mukroh kawa em hapoh Laskeiñ Block.
Hadien wa poi ha ini i thaw, ki dkhot ka UHM, ki dkhot ka chnong wa u Sordar ka chnong Saba da chah dat ki ha ki 30-40 ngut ki bru wa rah lang wa ki dieñ, ki wait, ki moo kiwa wan na Karbi Anglong kiwa da tba kti ki ya ki dkhot ka seiñ heiwa da mynsoo leh u Organising Secretary ka Central Body ka UHM deilang wa 3 ngut ki dkhot kiwa da kit chwa nyngkong ya ki cha Barato PHC yow yoh sumaar ki wei hadien ya ki 3 ngut kiwa mynsoo joor da kit cha Shillong.
Ka seiñ da ong ko wa da lai ko cha katai ka thaw ym toh yow pynkulmar wei da lai pait donhi neibynta ka suk ka saaiñ wa ya ka mynried wei ym toh yow yoh burom. Deiwa beiñ leh ya ki pulit ka Assam kiwa emlang ha itai i por wa jia heiwa ym em leh ki iyi iyi wow yada hadooh wa da chah beh chah kdong ki dkhot ka seiñ kam ki mrad.
Neiliang u Waheh Chnong u A. Suchiang, da ong u i lai toh yow pynsakhiat wa em itæ i chna ya ka Police Outpost heiwa manda pyrchang u yaklam da phah yang ya ki yow yaklam wa u heh pulit heiwa uni u heh pulit wa em chi khloor da wanrah lang u wa kiwa chong chnong Umkhermi kiwa da rah lang wa ki tiar ki tar.
