Ynnin i miet ha i por kamwa 10 wa 11 waje da mih i huri hura ha ka chnong Nongmensong, heiwa uwi u khynroo da chah dat u ha ki bru wa da pynbaad toh ki baar jylla. Ini i chah dat utai u khynroo da warah ko yei chrai ya ki dkhot ka Khasi Students Union kiwa da poi cha itai i thaw.
Katkam ka khubor wa da yoh, ini i kulmar da joor bha i heiwa uwi u pulit CRPF da mynsoo u wei da em leh i kawang moo ya ka kari pulit wa ya ka thanat ha Nongmensong.
Hawa yoh u yaklam wa utai u khynroo wa chah dat, da pyntip u wa itai da jia i katwa dang chong ke u wa uwi u pulit uwa kylli lada dih drugs u, wei ya utai u pulit ym tip pyrtuid ya oo, heiwa ha ini i por da em ki bru wa wan dat ya oo tangwa ya utai u pulit ym chah tbai kti u heiwa da pynsñiaw u wa suba wa em i soohbuit u pulit wa ki damok wa dat ya oo.
Hawa kylli, da pyntip u wa i wan ki paidbah ye u man wa em kiwa tipmit ya oo kiwa da lai wow yarap, da pyntip u leh wa ym tip u neiwon wan ki damok kiwa da wan dat ya oo khlem iwon iwon i daw. Da pyntip u leh wa hadien wa wan poi ki pulit, da rah noh ki ya oo wow leh ya ka Medical Check-up.
Uni u khynroo da kyntu u ya ki bor ka aiñ wow kem wei pynchitom ya ki damok wa emkti.
Hawa pyrchang wow yaklam wa u waheh chnong, da ong u wa ka chnong ym yoh ko yei ujor hajrong ini i jia, wei da pynsñiaw u leh yei lynngoh wa em ki bru ha ka chnong kiwa dang mih chongke cha sarok hawa da pynkrehkaam ya Night Curfew.
