Shillong: Ynnin i miet heipor kamwa 11:00 waje uwi u heh ka Hynniewtrep Youth’s Council (HYC) NEHU Unit da chah dat u ha ki damok wym tipmit kiwa em kamwa 10 ngut yeiwa ka seiñ da ujor ko ha Mawlai Police Station wei ynne won da yachem ko ya u Superintendent of Police (City), u Steve A Rynjah wow kyntu ya ki pulit wow kem noh ya kini ki damok.
U Enlang Sawian uwa man u Secretary ka HYC Shillong City, da ong u wa kini ki damok da lai thooh ki ya ki dkhot ka seiñ ha Kupli Hostel ka NEHU wei da chem ki ya uni u dkhot ka seiñ ha ka kamra wa 18 heiwa da dat da bom ki oo da ki tiar pynmynsoo.
“Lada em iwon iwon i eh namo i wym sñiawthooh yumut, da toh u wan yachem ki markhmat wow yaklam, ymtoh wow wan thombor hi-eh,” da ong u.
Da pynrap chooh chooh u deiwa ong “Lada kam kini pteiñ ki u jia ya kiwa kitkaam ka seiñ, neiliang ka HYC leh ym chong kli-kti ko,” wei ynne ka seiñ da yachem ko leh ya u SP City hajrong ini i kaam heiwa neiliang u Steve da kular u wow chimkhia yeini waroh.
Kam wow pynkynmoo heini, ka HYC ynnin ka sngi da pynkha ko ya ka chnat krehkaam ha NEHU wei hei miet won da mih ini i jia.
Hajrong ini waroh neiliang ki dkhot ka NEHU Student’s Union (NEHUSU), ynne i janmiet da yachem ki ya u Vice-Chancellor, u Prof. S. K Srivastava neibynta i chong chngaaiñ ki khynnah wei wow pynkhlan leh ya ki bor sonteri ha kani ka skurbah.
Neiliang u Advisor ka NEHUSU, u Rangdajied Marwein da beiñ joor u yeini i jia wa chah thombor ki khynnah ha ki thaw sah yong ki deiwa beiñ leh ya ki bor ka skurbah wymye ki u pynbiang ya ki bor sonteri ha kani ka thaw puræ.
Chooh chooh neiliang u Vice Chancellor da kular u wow chimkhia wei wow ujor hajrong ini i jia waroh wei wow pyntikna wa ki khynnah u man ki kiwa chong chngaaiñ ha kani ka skurbah.
Discussion about this post