Shillong: Ynnin ka 1 tarik da mih i awri ha ka yung sah Quarter yong kiwa kreh sorkar kawa em ha Additional Secretariat, Shillong heiwa uwi u Punjabi da dat u da u naar rod ya uwi u bru Bihari hadooh wa da mynsoo joor u na khlieh.
Ini da jia i hadien wa haap ka bol Cricket yong ki khynnah ha tnoom yung yong uni u Punjabi uwa da tip kam u Kuldeep Singh uwa kreh kam uwa lum ya kani ka yung krehkaam sorkar.
Katkam wa pyntip u Shekhar Kumar uwa 17 snem, uwa man u khon yong uwa chah dat da ong wa hadien wa haap ka bol ha tnoom yung u Singh katwa oo wa ki lok u dang yalehke Cricket ki heipor kamwa 2 waje nohchariñ ka sngi.
U Shekhar da pyntip u wa heipor wa lai paan ki ya ka bol da mih u khon u Kuldeep wa tip pyrtuid kam u Boby Singh uwa da khang wow chim ya ka bol wei hadien wa da choh ya ka dwar yung da mih u Kuldeep heiwa da klam u da ki ktien wa khor iwa da wanrah yei awri hapyrdi yong ki.
Da ong u wa u Kuldeep ym em chah u ya ki wow chim ya kani ka bol deiwa ong wa man ko ka tnoom yung yong ki wei heitæ i por da mi hi awri awra wa joor iwa da pynman ya u pa yong oo wa ki marjan wow mih wow pynyasuk tangwa heitæ wot i por u Kuldeep da dat u ya u pa uni u khynnah da u naar rod na khlieh.
Uni uwa chah dat da tip kam u Ganesh Roy uwa kreh kam u Chowkidar ha kani ka yung krehkaam wei uwa sah ha ka kamra wa chapoh yong katai ka yung. Ya u Ganesh da pynkit noh cha Civil Hospital Shillong wow chah sumaar.
Ha iwi i liang u Ganesh da ong u wa u Kuldeep dei langær jooh klam khlem akor u wei jooh krai u wei jooh maham u ya ki marjan.
Hawa yaklam wa ki bru kiwa sakhi yeiwa jia da beiñ ki ya u Kuldeep wa man u u bru uwa jooh leh heh man i por. Da ong ki leh wa heipor wa mih i awri da khut u leh ya ki Punjabi kiwa sah ha Them Iewmawlong iwa da pynjoor yei awri hadooh u pood wow ya mynsoo.
Kini ki bru wa sah marjan ha katai ka thaw da dawa ki wow kem noh ya u Kuldeep wei wow pynchitom noh ya oo katkam ka aiñ.
Discussion about this post