Da ki boon snem uwi u Branch Manager ka ICICI Bank deilang wa kiwi kiwa ya krehlang da ye ki wow poi cha ka thong kreh (Performance Target) wa da booh deiwa sai poisa na ki Account ki bru wa em ha kani ka Branch yow pynemkaam ka yow thap Fixed Deposit, u wai Current Account wa ki Saving Accounts yow pynbiej ya ki heh kani ka Bank deiwa pynyoo wa em kiwa wan wai Account wei kiwa wan booh Fixed Deposit.
Ini da jia ha kawi ka chnat ka ICICI Bank wa em ha Rajasthan tangwa da em uwa chem yeini wa leh ki wei da sdang u wow dawa poisa ki wei lada ym su ki daw lai khana u cha ki heh kani ka Bank. Yow pynsuki ya uni, kini kiwa kreh Bank da sdang ki wow sai chooh chooh ka poisa na ki Account bru yow dap ka poisa yow pynsuki ya uni u bru uwa na Udaipur.
Ki pulit ka Rajasthan da chem ki wa da dep su hadooh Rs 2.5 klur cha uni u bru da u ICICI Bank Branch Manager.
I buit wa da pynemkaam u Branch Manager wa kiwa kreh u toh deiwa pna wai hi ki ya ki Account thymme (Savings, Current wa Fixed Deposit) deiwa chna da ki Overdraft yow leh yeini iwa hei rukom kreh ki Bank da tip kam ka ‘Entry and Reverse Entry’. Wei hadien kattu katni sngi da khang ki ya kini ki Bank Account wa dang wai thymme ki wei yaka poisa da phah biang cha ki Account yong ki tre wei yeini da leh ki da boon snem.
Uwa e ktien ka ICICI da ong u wa ym em uwon uwon wa daw dooh ka poisa ki wei ya kini wa emkti heini da chah beh kreh ki wei da pynman yaka takit wei da e leh da ka FIR.
Ki pulit ka Rajasthan da ong ki wa poisa kawa da wiar dapoi ko Rs 2.5 klur tangwa ka Bank won da ong ko Rs. 2 klur.
Kani ka poisa ym pu tip na kawon ka Account wa da sai ka wei ka takit dang pyrchang ko wow kheiñ da boon snem chadien yei rukom lai i wan ka poisa ha kani ka chnat.
Da pynsangeh leh i krehkaam ki 62 tylli ki Bank Account wa da pynemkaam ha ini waroh kawa dapoi ka poisa Rs 62,71,490. Ki pulit da chem ki leh Rs 46 lak ka poisa wa i ksiar wa da pynchah yow chim ram da u bru uwa na Udaipur uwa da chem yeiwa leh kini ki bru uwa da dawa poisa kylla ki yow lait u lai khana cha ki heh ki.
Ki pulit da chem ki leh wa uni u bru na Udaipur toh wa da em 19 tylli ki mukotduma pyrchah yaka oo kiwa yatoh nadooh ki kaam pynyap bru, i dawa poisa wa kiwi de ki kaam pyrchah aiñ.
Uni u bru da yoh u wow dawa poisa hadooh Rs. 45 lak na kani ka Bank yow pyndap poisa yow thied yei yung iwa Rs. 3 klur iwa da lai kem noh ki pulit hadien wa chem wa ka poisa wa da thied ya ini i yung toh kawa da sai tooh na kani ka Bank.
Ya ini waroh won da pyntip cha ki pulit da kawi na kiwa kreh ha kani hi ka Bank kawa da chem wa wiar Rs. 70 lak naka Account ka lok ko wei manda pyntip ko cha u Branch Manager, ym ye u wow e yei jubab wa biang tangwa da ong hi-eh u wa daw pynuiñ yaka poisa hadien 3-4 sngi tangwa ym em leh yeini iwa da pynman yaka wow lai pyntip cha ki pulit.
Discussion about this post