Kawi kawa chong chnong ka Tura kawa tip kam ka Jayne N Sangma da ujor FIR ha u OC ka Tura Police Station neidaw wa em wa pynemkaam Siren ha ka kari yong ki bru samen.
Katkam ka FIR da ong wa ini da jia i ha ka 17 tarik uni u bnai heipor wa liwan ko na Rongjeng cha Tura wei heipor kamwa 9:45 i miet manda poi ha Tura Chasingre hapyrdi wa joor u slap heiwa waroh ki kari dang lai ki jai yow lait u jai iwon iwon, da wan ka kari Toyota Fortuner kawa em ya u Number ML-08J-1974 kawa da pynhær wei kawa pynkieh Siren yow knieh u lai chakhmat.
Tangwa da khyrngiat won wow yoo wa kani ym toh ka kari ki heh sorkar wei toh ka yong u bru samen uwa tip kam u Sanjay A Sangma uwa poi kha ha yung u Montri Rangbah ka jylla, u Conrad Sangma.
Chooh chooh da ong wa u Sanjay toh u bru paidbah donhi ym toh u MLA, u MDC lane u Montri sorkar wei ym toh leh u sahep sorkar tangwa da pynemkaam Siren u yow pynbor ya ki bru wow kyrriah luti ki ya oo.
Da ong leh wa kiwa emyatoh u Montri Rangbah ym em hok ki wow leh kamni kamtæ hajrong ini da ujor ya kani ka FIR.
Da kdaw leh wa nadooh ka Ministry of Road Transport & Highway leh ha ka 01-05-17 da khang ko wow pynemkaam Siren lane ki Beacon Light ha ki kari ki bru samen wei hadooh ka Supreme Court leh da khang ko ya kiwa mihkhmat paidbah hadooh ki Montri wow pynemkaam ya ka Siren waka Beacon Light hawa lai ki ha ki sarok paidbah wei hadooh u Montri Rangbahdooh ka ri wa katni leh da khang u yei pynemkaam bakla ya ki Siren wa ki Beacon Light yow pyndooh leh ya ka VIP Culture.
Kamtæ da kyntu ya ki pulit wow pynchitom ya uni u bru wa leh pyrchah.
