Ka Hynñiewtrep Integreted Territorial Organisation (HITO), ynne ka sngi da booh ko le tylli ki ujor kiwa kynthup ha ka Meghalaya Human Rights Commission (MHRC), ha u Chief Secretary ka jylla deilang ka FIR ha ka DGP, ka I. Nongrang, pyrchah ya u Deputy Commissioner wa u Superintendent of Police ka East Jaintia Hills yei rukom pynlai wei iwa jia ha ka Public ka Meghatop Cement Pvt. Ltd. kawa da pynman ha ka 18 tarik uni u bnai ha Wahiajer.
Ha ka FIR da ong wa i rukom pynman pynlai ya kani ka Public Hearing da u Franky Laloo na ka Meghalaya Pollution Control Board deilang wa Member Secretary ka Board, u Dr. G.H. Chyrmang wa u ADC ka East Jaiñtia Hills, u G. Warjri deiwa emlang kiwi ki bor District wa ki pulit wa kiwi mihkhmat kani ka karkhana man ko pyrchah ya ka aiñ wei kawa da leh khlem da bood kyndon.
Ka seiñ da ong ko wa nadooh i step da em ki bru wa da thung kam ki Volunteer kiwa da rah lathi kiwa da yang wei da khang ya u sarok wow lai cha kani ka Public Hearing deiwa khang ya kiwa pyrchah wow psiah ki wei heini i por ki pulit kamjooh ki bor District ym em leh ki iyi iyi yow e laad ya kiwa pyrchah u lai chimbynta ki katkam i hok ki.
Chooh chooh da ong wa kini kiwa wan wow pyrchah toh kiwa chong chnong kiwa da chah ktah sakhiat na ini i wan kani ka karkhana thymme.
Da ong leh wa ki bor pulit wa ki bor District hawa da yoo ki phlet yeini wa jia ym leh ki iyi iyi leh, neibhah u khang ya ki bru wow lai chimbynta ki ha ka Public Hearing man ko pyrchah ya ka aiñ.
Ka ujor cha u Chief Secretary, u DP Wahlang leh da ong ko i jooh deiwa khana yeini wa chah khang ki bru wa pyrchah wow lai chimbynta.
Ha ka MHRC leh da khana yeini hi wa jia wym em chimkhia ki bor District kamjooh ki bor ka aiñ wow pyntikna wa yoh ki paidbah yei hok yong ki.
Kamtæ na u CS da dawa wow kyriah kreh næ wow Suspend ya u DC wa u SP yeini wym ye ki wow leh yei kaam yong ki. Na ka DGP won da dawa wow pynchitom ki yeini wa leh ki wa man pyrcha aiñ katwa na ka MHRC won da dawa wow pynchitom ya kitu kiwa da khanglaad yei hok nadooh ki pulit, ki bor District kamjooh ki bru ka Pollution Board.
Neiliang u President ka seiñ, u Donbok Dkhar da dawa u leh na ka JHADC wow pyndooh sanad noh ya u Waheh Chnong ka Wahiajer.
Discussion about this post