Ki dkhot yong ka Meghalaya People United Front (MPUF) East Jaintia Hills District, ha ka 3 tarik uni u bnai deiwa ya emlang kiwa yahkhmat chnong da lai pait ki ya u sarok uwa tip kum u Rymbai-Bataw-Borkhat-Jelalpur Road, uwa lai cha ka chnong Borkhat lyngba ka chnong Rymbai, wa em hapoh ka East Jaiñtia Hills District, uwa da sih hadooh wa sa oor ki kynroh wa em ha uni u sarok.
Ka seiñ da beiñ joor ko ya ka chnat PWD hajrong i chah ieh beiñ uni u sarok katni da boon tylli ki snem, deiwa ong wa ka sorkar MDA kawa da wan wai donhi yaka yingkieñ khlem da chna won ya u sarok, wei da kyntu ya u Shitlang Pale uwa man u MLA wa toh u pait ya kani ka thaaiñ wa toh u pait lang yei eh ka chnong khamtam ya u sarok uwa man kam u budloom ka kamai kajih wei wow pynsuk yaki bru khamtam ha i por wa kjut wa chitom.
Ha ini i lai pait da chem wa uni u sarok toh uwa da sih cha palat pood nadooh wa lait ka chnong Rymbai khamtam haki bynta ka chnong Bataw-Lama ter ter hadooh Borkhat, wei heiyatoh wa ini, u Waheh Chnong ka Borkhat u Kyrmen Swer da pyntip u wa i sih wa i oor uni u sarok, neiliang ka chnong leh da pyntip ko cha ka chnat PWD tangwa hadooh katni ym pu em wan pynchna, khamtam yei oor ki kynroh u sarok. Da ong leh wa i daw wa uni u sarok sih u toh neidaw wym em ki nala namo ki Side Drain khamtam hajan yong ka yingkieñ, kamwa man katni, ka chnong ka pynchna hi ko katwa ye ki yaki nala harood sarok da ka Scheme 100 sngi iwa toh i kamram yong ka chnat PWD, da ong u.
Neiliang u Secretary chnong u Jewellson Rymbai da pynsñiaw u wa kani ka chnong da chah ieh beiñ ko ha ka sorkar ha kiwa boon ki liang, wei kamwa man katni, ki chrot bordiñ hapoh kani ka chnong da sap sarah ki wei boon leh kiwa da jan kheiñ ha ki thaw wa ye u wanrah yei maa wa i mynsoo ha iwon iwon i por ya kiwa chong chnong, deiwa khana leh wa heiyatoh wa ini neiliang ka Dorbar Chnong Borkhat da dawa ko na ka Meghalaya Power Distribution Corporation Limited (MePDCL), Khliehriat Distribution Division wow kylliang yaki chrot bordiñ kiwa em ha chnong Borkhat kiwa da jan oor.
Heiyatoh wa ini, neiliang ka seiñ daw lai ujor ko cha ka chnat PWD.
