Kiwa chong chnong ka Shilliang Myntang Hangrain, Khliehsaniriang, Bhain, Thadsning, Samatan, Thadialong, Lummuriap, Mobandu, Lathymphu, Umsalang, Musiaw, Thadbamon, Sookhlieh ki chnong kiwa haap hapoh ka 4-Mowkaiaw Constituency Assembly wa kamjooh ka chnong Mynkrem, Khliehriat, Saphohwaiong, longsnieh, Madansynrang kiwa haap hapoh ka 1-Nartiang Assembly Constituency wa kamjooh ka chnong Nongjngi kawa haap hapoh ka 3-Raliang Constituency Assembly da dap ki dei sñiawkhia wei sñiawsih hadooh kattæ kattæ neibhah wa ka sorkar da iehbeiñ ko ya u sarok nadooh na Nartiang chadooh Shilliang Myntang a kip haw snem hadooh katni.
Uni u sarok toh uwa da dep siang rong dang du chisien heipor wa man MLA wa kam u Montri PWD ka sorkar jylla u (L) Kyrmen Susngi wei hadooh katni ya uni u sarok ym em de da pynchna tang chisien leh iwa da pynmaad ya kiwa chong chnong yei eh wei chitom hawa lai wa wan ka kit wa bah neibah i sih uni u sarok toh chawa palat pood wa dap du da ki thlu ki krem nadooh na chnong Shilliang Myntang kawa jngai 23 Km hadooh wow poi ha ka chnong Nartiang wei uni u sarok toh uwa pynyabi chadooh ka chnong Khanduli.
Chooh chooh da ong wa kam kiwa chong chnong dap ki dei diaw mynsien wa ka sorkar ym em kyruiñ khmat ko cha uni u sarok neibhah wa lyngba uni u sarok da pynyabi ya kiwa boon tylli ki chnong yow poi cha ka PHC kawa em ha ka chnong Nartiang khamtam dooh ya ki manbei kiwa punkhon wow lai cha ki thaw sumaar wa kamjooh ya kiwa lai chim dawai na kani ka thaw sumaar.
Najrong ini, ki paidbah kiwa lai emkaam cha ka Police Station kawa em ha chnong Nartiang hawa yatoh wa ki kaam yong ka aiñ wa kamjooh ki khynnah wa lai skur ha ka chnong Nartiang, Ummulong, Jowai wot chadooh ka nongbah Shillong wa kiwi kiwi ki thaw wa hap wow lai luti na uni u sarok.
Da ktah leh ya ki warep kiwa lai su lai tda wow kit ya ki mar rep yong ki kam u syiñ, u chirmit, u saroo wa kiwi kiwi ki mar rep yow poi ha ka yaw kawa em ha ka chnong Nartiang, ha Wahiajer, ha Ummulong wa cha kawi na ki yaaw wa heh hapoh ka ri-loom Jaiñtia katæ ka Yaw Pynsiñ.
Kamtæ kam ki paidbah yong kani ka dong ka thaaiñ da kyrpaad ki ya ka sorkar wow sñiawbha u kyruiñ khmat cha uni u sarok wa da jæd da pra khlem em wa pait wei kam ki paidbah em hok ki wow yoh ya u sarok wa bha kamwa da yoh lang kiwi kiwa chong chnong yong ka jylla.
Ka kyrwoh na u Beristar Lamare, Waheh CHnong ka Shilliang Myntang, u Wipi Situng, Waheh Chnong ka Thadialong wa u Khiat Litep, Waheh Chnong Thadsning.
