Ka KSU Iooksi Circle da sñiawkhia ko hajrong i chah iehbeiñ wei lehbeiñ ki skur sorkar kiwa em ha ki thaaiñ palatsor wei yeini da pynsñiaw hadien wa wan pait ya ka Govt LP School Iooksi Iapkhla heiwa da chem wa kani ka skur da dap um ko.
Ka seiñ hapoh i yahkhmat u Sainia Sutnga, President hei emlang u Head Teacher ka Iooksi Iapkhla Government LP School, u D. Nongrum da lai pait ki ya kani ka skur wei da chem ki wa da dap um slap ko neibhah wa ki tin sap-yung da man ki kiwa da jæd wei kiwa da rim.
U D. Nongrum da ong u wa kani ka skur dang boon kiwa wan puræ ha ka kat dang mih u snem wei kani ka skur toh kawa paaw bha ka kani ka thaaiñ.
Kani ka skur toh kawa da kynjoh 102 snem kawa da seiñ ha u snem 1920 tangwa nei wym chimkhia ka sorkar wow chna pynmiat ya ka da chah ktah pathan ki khynnah katni wei ya ini i chem chitom ki khynnah wa kiwa sikai ka skur dadep ujor leh cha ki bor wa hajrong.
Hajrong ini neiliang u Sainia Sutnga da ong u wa ka seiñ daw lai yachem ko wa ki bor wa pait ya i puræ puthi wow leh yeiwa emkaam khnang wow suk ki khynnah khamtam heipor wa slap.
