Jowai : Ka hima Jaiñtia toh kawa da naam ha kylleiñ wei man ko kawa da synchaar da ki syiem na ka nongbah Jaiñtiapur.
Ha Jaiñtiapur da booh da tei ya ki yung sah ki syiem wa ki thaw wa lehniam ki syiem ha ki spah snem nachwa kiwa heh wa kmai, tangwa kini waroh man ki kiwa da chah ieh sepai hi-eh katni.
Da ong wa i yung sah u syiem wa em ha Jaiñtiapur da sliah ya i ha ki snem 1960-70 wei da chna noh ya kawi ka yung sumaar bru ha ini i thaw (Government Hospital) wei katni ym yoo de wot tang ya ki yurim yung lait noh na ki thlu um wa da tih na kitu ki por.
Ka thaw lehniam ki syiem wa em ha Yaaw Jaiñtiapur da yoo sakhiat ya ki dak wa man kini ki thaw kiwa chah ieh beiñ ha ka sorkar neidaw wa dap ko du ki jhep wei ki moopynyieñ leh man ki kiwa da pat da piah da oor.
Ki kynroh ha kani ka thaw da man ki kiwa da piah da kaad da oor, da biah ya ki dur næ ki poster wa ki placard, ha kani ka thaw da pynman ya ki yalang paidbah aw jan man ka sngi.
Ha ki chram leh da tah da chniah ya ki dur bru, ki dur u kule, hati wa kiwi kiwi, tangwa kini da sdang khoh lut ki katni.
Ini i thaw man i iwa da yada katkam ka aiñ Antiquities Act 1968 yong ka ri Bangladesh wei da pait da yoo ya ka da u Director of Archeology and Museums, kani ka ri.
Na ini i thaw won kamwa 8-9 km hachwa wow poi ka yingkieñ hajrong ka wah Shari-Goyan (i pyrtuid ka Wah Myntdu ha Bangladesh) da em iwi i yung moo ha pyrdi u sarok Jaiñtiapur – Sylhet.
Da parom wa ini i yung toh iwa da chna kyrpang u syiem neibynta ki paidbah kiwa lai luti heiwa ye ki u sahmiet ha ini i yung. Ini i yung da bhah ya i ar bynta wei man i iwa miatdur bha neidaw wa da ah chrong ya ki da ki moo ha i dur ki syntu wa kiwi kiwi.
Ki tre chnong da ong ki wa ini i yung man i iwa ye u chah sliah lada chna ka sorkar ya u sarok Four-lane na Jaiñtiapur cha Sylhet.
Discussion about this post