Jowai: Ka sorkar Meghalaya ha kini ki tayaw da yaleh ko wow wanrah ya ki tre jylla kiwa sahkut cha baar jylla wei manda poi ki da phah leh ya ka Quarantine ha ki thaw wa da pynkhreh ko ha kylleiñ, tangwa ha West Jaiñtia Hills won hadooh katwon da man ki bor sorkar kiwa da pynkhreh neibhah da em i ood i khñium khamtam kiwa haap chongkset ha Hostel ka skur JNV Mukhla.
Ynne ka sngi hadien wa yoh ya ka Report wa yoh COVID-19 kawi ka bru ha West Jaiñtia Hills, ini da wanrah i yei khyrngiat khamtam ya ki 12 ngut kiwa chongkset lang chirup wa kani kawa yoh ya uni u khñiang.
Nyngkong da em 13 ngut kiwa chong Quarantine wei hadien wa chem wa yoh COVID-19 kawi ynne da kyrriah noh ya ka na ini i thaw wei da em sa 12 ngut katni.
Kini ki 13 ngut da wanpoi ki ha Guwahati na jylla Uttar Pradesh ha i miet ka 29 tarik wei da poi ki ha West Jaiñtia Hills ha i step ka 30 tarik wei hawa yaklam wa ki da pyntip ki wa da poi ki ha JNV Mukhla heipor kamwa 3:00 waje i step.
Nadooh wa poi ki da yoh baam ki da u puri du heipor kamwa 10:00 waje i step wei hadien ini da phah ya ki mar baam (Dry Ration) kam u khoo, syllah, piat wa kiwi kiwi wei da phah chet pyn daki hi.
“Manda paan i dei baam wa dadep chet chwa (Cooked Food) neibhah wa ngiah ware i wa wan luti jngai i, kini ki wakreh da ong ki ya i wa ym em wa chet wei lada ym tip u chet ymboi baam ai,” da khana kawi na ki 12 ngut.
Deiwa ong leh, “Iwa phylla toh wa ka Lighter wa e ki wow pynkop diñ ya ka Gas toh kawa ym em krehkaam wei hadien wa da phone cha kiwa toh u pait wow pynbiang yeini da nohtai ki nawi chawi (deiwa phah phone na uwi u number cha uwi tawon), wei khaddooh dei wym yohsa da paan diñkot na ki tre chnong tæ yoh i wow chet”.
Kini ki 13 ngut dei wym yohsa da chet ki pyn ha kani ka thaw.
Ynne manda tip ki wa kawi na kiwa chongkset lang wa ki da yoh ko ya u COVID-19, da khyrngiat da tieñ ki neibhah wa da haap sah ki chirup wa ka wot wow chet wow tu wei wow baam leh chirup.
Da kylli ki hawa ka sorkar phah jngai ko iwi na iwi yow lait u khñiang u poor neiyi i daw da phah sah lang ya ki chirup?
Da pyntip ki wa ynne da yaleh wow murieh chwa ya ka Report kani kawi, “Neiyi i daw wym khana che ki hajrong kani ka Report ileh i ym em hok i mo wow tip neibhah hadien wa kylli ma kylli tæ ong ka ma’am wa man positive kawi? Mynnu u leh Test biang ya i? Ileh chah iehbeiñ i kamni? Iyi wow jia ya i neini chakhmat?” da kylli ki 12 ngut dei yooluti wow yoh jubab deiwa che na ki bor sorkar.
“Ynne mar tip i wa yoh COVID-19 kawa sah lang i da tieñ da yaam lut i,” da ong kawi na kiwa sah ha kani ka thaw.
Da pyntip ki wa i thaw noh jhep da booh da ka synduk wei nadooh wa wan ki ha i step ka 30 tarik hadooh ynne ymem wa thooh ya i jhep wei i jhep da sdang sma i.
Kini ki 12 ngut da ong ki kamni, “Sorkar ym kwah de i wow liwan yung wow pynchitom ya ki ha yung ha chnong, sñiawbha kyrriah noh ya i na kani ka thaw (Dorm) wei wow e thaw sah ya i jar jiar ki kamra”.
Discussion about this post