Jowai: Ka Junior Football Trials da pynman ya ka ha u Naitung 2019 da ka BOCA Juniors Football School chirup wa ka North East Indian Goal ha East wa West Jaiñtia Hills District heiwa da chimbynta hadooh kamwa 3000 ngut ki khynnah.
Ki heh ka BOCA hadien wa da sylli bniah ki ya kini ki khynnah da jied ki ya ki 10 ngut ki wow lai cha Bangalore wow chah hikai ki ha ka yalehke football wa kamjooh i puræ puthi deiwa yoh ki leh ya ka Full Time Scholarship.
Ki khynnah kiwa da chah jied man ki kamni hawah:
- Besterly Ksih
- Chemi Suchiang
- Daniel Chullet
- Grafanberg Poit
- Iaishah Bareh
- Ferdison Bareh
- Elvis Nongtdu
- Pynjailang Ryngkhlem
- Hamedamanbha Thma
- Hubert James Lyngdoh
Neiliang u CEO ka NEIG, u Ajoymeson Lyngdoh da ong u wa ki khynnah kiwa ym em u chah jied ha uni u snem ymtoh u sñiawphær ki deiwa pynrap wa ka NEIG u pteiñ ko wow kreh wow kyntu kynrong ya ka kaam yalehke football ha ri-loom Jaiñtia wei daw wai ko leh ya ka Football Academy ka wow em ha Jowai.
Ka thong yong kani ka Academy toh wow pdiang ya ki khynnah wei wow hikai ya ki wow ye ki u chimbynta ha ki Junior I League kam ka dhab heiwa ki khynnah wa chah jied ym haap su ki katwa em ha kani ka Academy.
Da e khublei u leh ya u NEIG Director, u Kyrmen Shylla uwa man leh u montri ka sorkar jylla uwa da e kyrchaan ya ki khynroo khyllood ki khynnah kamjooh leh wow yarap pynku ya ka kaam yalehke football.
Ka Club Atlético Boca Juniors toh kawa na ka ri Argentina.
Discussion about this post