Ynne ka sngi da pynman Election yow jied ya u Chairman ka Jaiñtia Hills Autonomous District Council (JHADC) heiwa da em ar ngut kiwa yakhun ya kani ka chuki kiwa kynthup ya u Dr. Sankey Shangpung (MDC ka Bataw Lakadong) wa u Rikut Parien (MDC ka Saphai Sahsniang).
Ya i yajied Chairman da pynlai da u Deputy Commissioner ka West Jaiñtia Hills, u Abhinav Kumar Singh.
Da jied ya u Chairman deiwa pynemkaam ya ka Ballot Paper heiwa waroh 29 ngut ki MDC da chimbynta ki hei thap Vote.
Hadien wa thap wei manda ñiaw ya ki Vote da mih ka Result heiwa u Dr. Sankey da yoh u 20 Vote, u Rikut da yoh u 6 Vote katwa 3 Vote won da lai ko cha ka NOTA. Kam wow kdaw heini wa ka NPP da em ko 13 ngut ki MDC wei da kyrchaan ya ka yow chna EC da ka UDP wa em 3 ngut ki MDC wa ar ngut ki kyrtong samen iwa dapoi waroh 18 ngut, iwa mut wa da em ar ngut kiwa na ka liang pyrchah wa e Vote cha u Dr. Sankey.
Kam wow kdaw heini u Dr. Sankey ha ka samoi krehkaam ka JHADC wa dadep da man u leh kam u Chairman ka Council hi.
Neiliang ki MDC da kitbok ki ya u Dr. Sankey wow man kam u Chairman wow yahluti ya ka JHADC deiwa miat, khlem noh chiliang wei wow e laad ya kiwi ki MDC wow klam wow yañia ha ki phang wa wanrah yaklam.
Discussion about this post