Ka Chithi da man ko kam ka phlim wa nyngkong dooh wa pynmih na Ri-loom Jaiñtia wa da chah jied yow pynyoo haka 15th Bengaluru International Film Festival 2024 kawa man ka rynsan pynyoo phlim wa da wan chimbynta na 50 tylli ki ri wei da pynyoo 200 tylli ki phlim ha 14 tylli ki thaw.
Ha ki snem wa da dep, kut wa pynman da wan 10,000 ngut kiwa chimbynta wei kani da man ko i sarong yaka Simi Khongtiang kawa man ka Director ‘Ka Chithi’ wei u moomær wow sahkynmoo ya kiwa chna phlim napoh Ri-loom Jaiñtia.
Ka Chithi daw yakhun ko leh wow yoh nei naam jop hapoh ka kyrdan Indian Competition Section deiwa emlang 11 tylli kiwi ki phlim kiwa da jied na kiwa boon ki thaaiñ ka ri India.
Kani ka Bengaluru International Film Festival toh kawa daw sdang haka 29 tarik uni u bnai hadooh ka 7 tarik u bnai wow wan.
Ka Chithi da man ko leh kamwa wai yaka dwar yow pynyoo pyrthai yei rukom im, ka dustur riti wa i rukom man ka imlang sahlang ha Ri-loom Jaiñtia kiwa boon ym du hapoh ka ri tangwa cha baar ri ym jooh em yoo ki.
Deilang wa Ka Chithi da jied sa ar tylli ki phlim wa pynmih na Northeast kitæ ka Joseph’s Son na Manipur, wa da Direct da u Haobam Paban Kumar waka Samparpan na Assam kawa Direct da u Arup Manna.
Neiliang ka AntHill Productions kamjooh ka Simi Khongtiang da pynsñiaw ki yei kmen yow yoh yeini i burom wow lai rah naam yaka Ri-loom Jaiñtia wei da e khublei ki leh ya waroh kiwa embynta ha kani ka phlim.
Discussion about this post