Jowai: Ka chnong Rymbai da man ko ka wi na ki chnong kawa da chah jied ha ka sorkar India yow man kam ka Digital Village. Ha Meghalaya da em 11 tylli ki Digital Village wei ka chnong Rymbai da man ko kawa nyngkong dooh wow chah jied ha East Jaiñtia Hills District.
Ka Digital Village, mut ko wa ka chnong u pynkrehkaam ki da ki Computer ha kiwa boon ki liang khamtam ha ka e-Governance, heiwa kiwa chong chnong daw pynemkaam bait ki da ka Internet ya ki kaam wa ye u pyndep Online.
Na ini i chah jied kam ka Digital Village, da man ko ka kabu ksiar ya ki paaid chong chnong heiwa daw yoh ki ya ka e sikai pynemkaam Computer wa mynkna, u thap Form Online, u pynemkaam ya ka kaam poisa lyngba ka Internet, daw yoh ya ki Solar Light LED, ki sikai ha ki skur lyngba ki Digital Technology wa kiwi kiwi de ki kaam lyngba ki Common Service Centre.
Neiliang ka sorkar pyrdi da booh thong ko wa ha chi snem wow wan lyngba ka Ministry of Electronic and Information Technology daw jied chi lak tylli ki chnong wow pynkylla kam ki Digital Village ha ri India. Ya ka chnong Rymbai da jied dei ya krehlang waka Releaseme Sympli, VLE (Village Level Entrepreneur) yong ka Digital Seva CSC Rymbai.
Ini i chah jied ka chnong, da pynkmen ko chiboon ya ki paidbah yong ka chnong, kiwa da pynman ya ka yalang kam ka dak wow wai ya kani ka Digital Village, ha kani ka yalang da yoh yei klam na u Justice Lyngdoh uwa man kam u waheh chnong ka Rymbai uwa man leh kam u Chairman ka yalang, da yoh leh yei klam pdiang burom na u Lincoln Nixon Dkhar uwa man Secretary Dong, da pynbood sa u Kyrmen Chyrmang na SBI (Ladrymbai Branch) uwa klam chaphang ka Financial Inclusion wa u Joshua H. Lyngdoh, State Head yong ka CSC E- Governance Services India Ltd, uwa da pynsñiawthooh ya kiwa boon ki myntoi wa ye u yoh lyngba ka CSC wei da kyrpaad joor u ya kiwa chong chnong wow ya krehlang ki waka CSC khnang wa ka chnong u nang ku ko. Da emlang leh u Elios Swer uwa man leh u Dolloi yong ka Elaka Rymbai, u Helpman Phawa waka Regina Sympli, District Manager CSC E- Governance Services India Ltd kamjooh waka Releaseme Sympli wa kiwi kiwi.
Da sam leh ya ki Prize yong kiwa chimbynta da u Doloi haka:
- “Run For Unity”
- PMGDISHA Certificate
- PM-SYM
Da pynchongkun ya kani ka sngi da i emlang leh ki paidbah chong chnong ka chnong Rymbai.
Kiwa klam ha kani ka yalang da pynsñiaw ki sñiawkmen wa da yoh ki kam kani ka kabu kawa wan ha ka chnong Rymbai. Da ong ki leh wa lyngba ini i yoh laad naka sorkar pyrdi, daw man ko ka yarap wa khroo ya ki paidbah, kawa daw pynsuk ya i rukom krehkaam ha kani ka juk kawa katni kawa pynemkaam da ka Internet.
Discussion about this post