Ka Darilin Tang kawa na chnong Iooksi, West Jaiñtia Hills District kawa man kam ka Research Scholar ka Department of Management, NEHU, Tura Campus da chah jied ko kam kawi na ki Delegates wow mihkhmat ya ka ri India ha ka Japan-East Asia Network of Exchange for Student and Youth (JENESYS) 2023.
Kani ka JENESYS toh kawa da pynman da ka Japan International Cooperation Centre (JICE) nadooh ka 12 tarik uni u bnai wei daw pynkut ka haka 19 tarik uni hi u bnai yow yoh u yachem mar dei khmat wei da sdang ya kani nadooh u snem 2015 hapyrdi ka Japan wa ki ri wa em ha Asia-Pacific Region.
Ki khynroo wa yoh u mihkhmat toh na ki 6 tylli ki ri kitæ ka India, Sri Lanka, Maldives, Nepal, Bangladesh wa Pakistan wei ha uni u snem da pynman ya kani ka Exchange Programme ha Tokyo wa kiwi ki thaw ka ri Japan.
Yei pyrtuid kini kiwa chah jied da tyrwa da ka Department of Youth Affairs ka sorkar India wei waroh da em ki 8 ngut napoh ka ri wei ka Darilin man ko du ka kawa chah jied naka thaaiñ North East.
I thong kani ka Exchange Programme toh yow wanrah i sñiawthooh wei chaniah hapyrdi ka ri Japan waka Asia-Pacific Region wei wow pynyatoh lok leh neibynta ka mynried kamjooh yow ya krehlang.
Neiliang ka Japan u pynyoo ko kammon krehkaam ka khayi pateiñ hapoh ka ri, i rukom man ka imlang sahlang, ka dustur riti, ka synchaar khadar wa kiwi kiwi de.
Discussion about this post