Jowai: Ka khyllood Hundaka Lhuid kawa na Ladthadlaboh, Jowai da wanrah burom ko ya ka ri-loom Jaiñtia deiwa chah jied ko wow lai chimbynta cha Baltimore, USA ha ka yakob miat kynthai wa tip kam ka Miss Glamour International 2018.
Ka Hundaka da chah jied ko hadien wa poi wa ar ko ha ka Miss India Glamour 2018 wa pynman ha Guwahati ha ka 2 tarik uni u bnai wei kani toh ka sien wa ar wa pynman ya kani ka yakob miat kynthai bha chynrang.
Ha kani ka yakob da em boon ki kyrdan yakob miat kynthai bha chynrang kam ka Miss India Glamour Diverse, Miss India Glamour, Miss India Glamour Teen, Mrs. India Glamour, Mr. India Glamour, Mr. India Glamour Teen waka Ms. India Glamour Petite.
Ha ka kyrdan wa yakhun ka Hundaka kawa jop toh ka Nadia Mary Syiemlieh, wa ar da yoh ka Hundaka Lhuid wa le da yoh ar ngut, ka Wandapynkmen Iawphniaw wa ka Marchie M Sangma waroh naka jylla Meghalaya.
Kiwa jop ka Miss India Glamour Diverse, Miss India Glamour, Mrs. India Glamour, Mr. India Glamour wa Mr. India Glamour Teen kiwa yoh nyngkong hadooh wa le u mihkhmat ki ya ka ri India ha ka Misses Glamour International 2018 wa Mr. Style of the World 2018 ka wow pynman nadooh ka 11 tarik hadooh ka 17 tarik u Naisaphra ha Baltimore, USA katwa kiwa jop Miss India Glamour Teen daw mihkhmat ki ya ka ri haka King & Queen of Universe ka wow pynman ha South Africa nadooh ka chi tarik u Naikhynde 2018.
Ka Hundaka toh ka khon ka Chirup Lhuid wei ka Hundaka da pyndep ko ya ka BA na Thomas Jones Synod College, Jowai wei da dep chimbynta ko ha ki yakop miat kynthai kam ha ka Winter Queen, Miss 7 Trep, Tyrchi Queen kamjooh ha ka yakop miat kynthai ka Thomas Jones Synod College.
Discussion about this post