Ynne ka sngi ka India da chah jied biang ko wow man kam ka dkhot wa chipor (Non Permanent Member) yong ka United Nations Security Council (UNSC) wei ini man i ka sien wa 8 wa chah jied ko wow man kam ka dkhot kani ka Council.
Ha i yajied ynne ha ka General Assembly, ka India da yoh ko 184 vote na ka 193 wei ka India u man ko dkhot kani ka Council ar snem.
Ki snem wa ka India da man ko kam ka dkhot wa chipor yong ka UNSC toh ha u 1950-1951, 1967-1968, 1972-1973, 1977-1978, 1984-1985, 1991-1992 wa ha u 2011-2012.
Ha kani ka kynti ka India u man ko kam ka dkhot ka UNSC toh ha u snem 2021-2022 wei u man ko kam ka dkhot nadooh ka 1 Duyatra (January) 2021 hadooh wa kut u snem 2022.
Ka UNSC em ko 15 tylli ki dkhot heiwa 5 ngut toh kiwa pura (Permanent Member) katwa 10 won ki dkhot wa chipor (Non-Permanent Member) wei ki dkhot kiwa pura toh ka China, France, Russia, United Kingdom wa United States.
I kaamram yong ka UNSC toh wow wanrah ya i chongsuk ha ka pyrthai waroh kawi lyngba ki kaam wa boon kam wow phah chipai cha ki thaw wa em i awri, wow tyrwa ya ki pyrtuid ki ri wa kwah wow man dkhot cha ka General Assembly, wow pynchitom ya ki ri (deiwa khang yei khayi pateiñ) wa kiwi kiwi.
Heiyatoh wa ini i chah jied dkhot ka India, neiliang u Montri rangbahdooh ka ri, u Narendra Modi da ekhublei u ya ki ri ka pyrthai kiwa da kyrchaan ya ka India wow man kam ka dkhot ka Council.
