Ynne ka sngi kawi ka khon khyllood ka Ri-loom Jaiñtia ka Darilin Tang kawa ka-it bha wow kreh ha ki kaam bhalang lyngba ka seiñ Akhil Bharatiya Vidyarthi Parishad (ABVP) da chah jied ko wow man kam ka dkhot ka Central Working Committee (CWC) ka seiñ.
Ini i chah jied ka Darilin da pynman i ya ka wow man ko kam kawi na ki 4 ngut ki kynthai ha ka CWC ka seiñ kawa em 50 ngut ki dkhot wei da man ko leh kawa samen ka kynthai (2 ngut na thaaiñ mihsngi, uwi na Assam) na thaaiñ mihsngi.
Ka Darilin toh kawa na chnong Iooksi Thlongmoo, West Jaiñtia Hills wei da psiah ko cha ka seiñ nadooh u snem 2009 wei da pyndep ko yei puræ M.Com na Pune University ha u snem 2015.
Neiliang ka Darilin da ong ko wa i thong wa hakhmat dooh yong ka toh wow kreh wow kyntu kynrong ya i puræ puthi ym du ha ki skur tangwa wot wow lai puræ ki ha ki kyrdan waphær waphær.
Da ong ko leh wa lyngba kani ka rynsan daw ye ko u wanrah wei wow yaklam hajrong ki eh i khoo ki khynnah ka thaaiñ mihsngi wa ka jylla Meghalaya khamtam ya ki khynnah kynthai.
