Man iwa sñiawsarong wa ka khynnah ka JNV Mawphlang, East Khasi Hills, wa da chah jied u na ki 40 ngut ki khynnah ka ri wow yaklam wa u Montri Rangbahdooh ka ri, u Narendra Modi ha ka 5th Edition yong ka Pariksha Pe Charcha.
Ka Shilla Bishnab kawa puræ Class IX ka Jawahar Navodaya Vidyalaya, Mawphlang da man ko kawi na ki khynnah skur wa da chah jied wow embynta ha kani ka Live Program hadien wa pyndap pyrtuid wei chah jied da ka Ministry of Education.
Ka Shilla da pynsñiaw ko yei sñiawkmen ya ini wa da yohlaad ko wei da ong ko wa daw klam ko chaphang ka Nation Education Policy 2020.
U Secretary ka chnat puræ puthi ka jylla, u Ambrose Ch. Marak da pynsñiaw u yei sñiawkmen wa da em kawa napoh ka jylla kawa chah jied wow yaklam wa u Modi wei daw yaleh yow yoh kiwa sikai wa ki khynnah skur wow pait yeini.
Kam wow kdaw heini, u Narendra Modi daw yaklam u wa ki khynnah, kiwa sikai wa ki manbei manpa na kylleiñ ka ri ha ka 1 Naitung 2022 heipor 11:00 waje i step ha Talkatora Stadium, New Delhi.
I thong yong ka Pariksha Pe Charcha toh wow wanrah ya i sñiawlaitlooid i thij i pyrkhat (Stress-free Atmosphere) ya ki khynnah wei wow wanrah lang ya ki khynnah, kiwa sikai wa ki manbei manpa kamjooh ka imlang sahlang chithaw wow pynjanai wei wow pynchlur ya ki khynnah wow khana yeiwa sñiaw ki samen.
