Ka WhiteHat Jr kawa man ka rynsan e sikai yaki khynnah wow leh Coding lyngba ka Internet kawa da sdang da u nong India u Karan Bajaj ha u snem 2018, da pynchlur ko yaki khynnah kiwa nadooh Class I hadooh Class XI wow chim kabu ya kani ka stat Technology yow yarap yaka imlang sahlang ha waroh ki liang. Heiyatoh wa ini da jied ko yaki khynnah na kylleiñ ki ri ka pyrthai heiwa da em palat 7000 ngut kiwa da yaleh yow chah jied wow yachem wa kiwa yahkhmat ha kani ka kaam hapoh pyrthai.
Na kini ki 7000 ngut tam, da jied ya 26 ngut wa kynthup yaka Meaidaibahun Majaw kawa na Shillong kam kawi na kiwa jop kiwa chna yaki App kiwa yarap yaki bru hawa im ki man-ka-sngi.
“Ka thong wa jied ya kini ki khynnah wow yachem ki wa kini ki bru wa chemphang toh yow pyndooh yaki moochynthut kiwa ki khynnah hap maad ki, deiwa e yaki ki tiar wa emkaam ki wow nang ku ki yow man ki kiwa laitlooid wow pynemkaam yei bor jabieñ ki, wei manda yoh ki yeini, iwa ye ki u leh toh iwa phylla bha,” da ong u Karan Bajaj.
Na ki 26 ngut kiwa chah jied, 22 ngut toh kiwa na India wa 4 ngut na USA.
Ka Meaidaibahun Majaw toh kawa dang 10 snem kawa da chah lehbeiñ ha ki para khynnah skur nadooh wa sdang skur ko wei da sangeh i manda lai skur noh ko chawi hadien Class II. Ini waroh toh iwa da chon bha hei pyrkhat pyrdaiñ yong ka heiwa ynnin u snem da sdang ko wow yoh sikai Coding wei ka App wa chna nyngkong ko toh ka Anti Bullying App kawa yarap yaki khynnah wa chah lehbeiñ yow kdaw ya kiwon kiwa lehbeiñ ya kiwi ki khynnah hapoh ka skur wei yow ye u pyntip ya ini cha ki bor ka skur kamjooh kiyi ki kaam wa leh kini kiwa lehbeiñ.
Lyngba kani ka App da murieh yei pyrtuid ki khynnah wa chah lehbeiñ wei da pynchlur ya kiwa sikai wa ki bei ki pa yow leh ki yeiwa emkaam.
Neidaw wa em ka khlam COVID-19, i yachem wa ki bru chemphang da leh lyngba ka Internet heithaw kamwa thmu wow yachem ha San Francisco, USA.
