Kawi ka kynthai na Doom Dooma, Assam da chah jied ko wow chondur ha Paris Olympics 2024, wei kani toh ka Gitika Talukadar kawa man leh kam ka kynthai wa nyngkong dooh ym du na Assam tangwa na India kawa man ka Photo Journalist wow yoh yei tipmit da ka IOC yow chondur ya ka Paris Olympics.
Ka Gitika toh kawa da ye u chon ya ki dur kiwa sahnaam heipor wa man ki yalehke Sports ha kylleiñ ka pyrthai.
Nachwa jooh man ko kawa pawnaam ha Doom Dooma, Tinsukia District neidaw wa man ko kawa stat u chaad wei wow rwai.
Da lai skur ki ha Doom Dooma Kendriya Vidyalaya wa ha Doom Dooma College.
Ini wadep ka Gitika da tipmit ya ka da ka International Olympic Committee (IOC) neibynta ka Paris Olympic Games 2024 heiwa chwa ini da embynta ko ha ka Tokyo Olympics 2020 ha Japan.
Da jooh chimbynta ko leh ha ka FIFA Women’s World Cup ha Australia wa New Zealand, ka FIFA World Cup ha Qatar, FIFA Women’s World Cup ha France, FIFA World Cup ha Russia, ka ICC Cricket World Cup ha London, IPL, Commonwealth Games wa kiwi kiwi ki lympung yalehke.
Ka Gitika da pyndep ko ya ka Master’s Degree in Sports Management na Seoul National University ha South Korea hadien wa yoh Scholarship ko na ka Ministry of Sports, Republic of South Korea ha u 2020.
Discussion about this post